28—29 ноябрь кунлари Тошкентда «Замонлар чорраҳаси: Ўтмишнинг буюк мероси-маърифатли келажак пойдевори» мавзусидаги халқаро медиа-форуми бўлиб ўтади, деб хабар бермоқда «Darakchi.uz».
Тадбирда дунё илм-фан жамоатчилигининг еткачи вакиллари, музей, кутубхона, илмий институт ва бошқа халқаро ташкилотлар раҳбарлари, маҳаллий олим ҳамда экспертлар иштирок этади.
Халқаро медиа-форумда «Ўзбекистон маданий мероси» медиа-лойиҳасининг «Шарқ ёзма ёдгорликлари дурдоналари» номли янги туркуми тақдимоти бўлиб ўтади.
Шунингдек, тадбир жараёнида асл нусхалари Россия Фанлар академиясининг Шарқ қўлёзмалари институти ҳамда Франция миллий кутубхонасида сақланаётган, ўзига хос технологиялар асосида махсус қоғоз ва ҳақиқий олтиндан тайёрланган қадимий қўлёзмаларнинг факсимиле нусхалари Ўзбекистон ҳукуматига топширилади.
Ушбу маросимда ҳукумат вакиллари «Катта Лангар» Қуръони, «Девони Ҳусайний», «Поклик боғи», «Темур тузуклари» каби қўлёзмаларни қабул қилиб олади.
Бундан ташқари тадбир давомида ҳужжатли фильмлар тақдимоти ҳам ўтказилади. Шу билан бирга, Буюк Британия, Франция, Россия, Туркия, Чехия, Япония музейлари ҳамда кутубхоналарининг олимлари 2018 йилда чоп этиладиган янги альбомлар бўйича махсус маърузалар билан иштирок этади.
Медиа-форум доирасида Ўзбекистон мусиқа санъати оқшоми, шунингдек, ХХ аср бошларида ёзиб олинган ва яқинда қайта тикланган ўзбек мусиқа санъатининг илк аудиоёзувлари тақдимоти ҳам бўлиб ўтади.
Изоҳ (0)