Ўзбекистон иқтисодиётига 300 минг доллардан кўпроқ инвестиция киритган чет элликлар инвестор визасини олиши мумкин, бу эса, ўз навбатида, уларга қисқа муддатда мамлакат фуқаролигини олиш имкониятини беради. Бу ҳақда «Spot.uz» хабар бермоқда.
Интернетда эълон қилинган инвестицион кодекс лойиҳасида виза инвестори тушунчасига таъриф берилган. Ҳужжатга кўра, инвестор визаси бошқа визаларга нисбатан бир қатор устунликлар беради, бу имтиёзлар орасида Ўзбекистонда доимий яшаш ҳамда қисқа муддатда мамлакат фуқаролигини олиш имконияти бор.
Ўзбекистон иқтисодиётига камида 300 минг доллар, махсус иқтисодий зоналарга эса 150 минг доллардан кам бўлмаган маблағ тиккан чет эл фуқаролари инвестор визасини олиш имкониятига эга бўлади.
Инвестор визаси чет эллик инвестор ва унинг оиласига қуйидаги ҳуқуқларни беради:
- мамлакатда доимий яшаш;
- қисқа муддатда фуқаролик олиш. Бунда ўзбек тилини ёки Ўзбекистон тарихини билиш талаб қилинмайди;
- ўқув муассасаларига бориш, фуқаролик-ҳуқуқий муносабатларга киришиш, ишга жойлашиш, ижтимоий ва тиббий хизмат кўрсатиш тизимидан республика фуқаролари тенги фойдаланиш.
Инвестор визаси ташқи ишлар вазирлиги томонидан инвестициялар бўйича қўмита билан келишилган ҳолда тақдим этилади. Инвестор визасини бериш тартиби Вазирлар Маҳкамаси томонидан тасдиқланади.
Қонун лойиҳаси 7 декабрга қадар муҳокама қилинади.
Изоҳ (0)