Ўзбекистон Президенти Шавкат Мирзиёев «Республика олий таълим муассасалари бакалавриатига кириш тест синовларини ўтказиш тартибини такомиллаштириш тўғрисида» қарор қабул қилди. Бу ҳақда ЎзА хабар бермоқда.
Ҳужжатда қайд этилишича, кириш тест синовлари топшириқлари ва уни ўтказиш талаблари қобилиятли ёшларни олий таълимга қабул қилиш мезонларига тўла жавоб бермайди. Айниқса, ижодкорлик ва индивидуал маҳоратни талаб этадиган маданият, санъат, дизайн, тасвирий ва амалий санъат, санъатшунослик, мусиқий таълим, спорт ва жисмоний тарбия соҳасидаги таълим йўналишларига иқтидорли ёшлар ўрнига, ушбу соҳаларда етарли иқтидорга эга бўлмаган ёшлар тест синовлари орқали ўқишга қабул қилинмоқда.
Ушбуни назарда тутиб, Олий ва ўрта махсус таълим, Халқ таълими, Иқтисодиёт, Молия вазирликлари ва Давлат тест марказининг маданият, санъат, дизайн, тасвирий ва амалий санъат, санъатшунослик, мусиқий таълим, спорт ва жисмоний тарбия соҳасидаги таълим йўналишларига қабул қилишни кириш тест синовларисиз, ижодий имтиҳонлар орқали амалга ошириш ҳақидаги таклифи маъқулланди.
Шунингдек, мазкур қарор билан Молия вазирлигига Давлат тест марказининг бюджетдан ташқари маблағлари ҳамда олий таълим муассасаларининг оширилган тўлов-контракт тушумлари (5 фоизгача миқдорда) ҳисобига бир ой муддатда Давлат тест маркази ҳузурида Давлат тест маркази фаолиятини ривожлантириш жамғармасини ташкил этиш топширилди.
Жамғарма маблағларидан Давлат тест марказининг моддий-техник базасини мустаҳкамлаш, марказ ходимларининг моддий рағбатлантириш, хорижий давлатлар ўқув ва илмий муассасаларида малакаларини ошириши учун фойдаланилиши белгилаб қўйилди.
Изоҳ (0)