Шайхонтоҳурда 4 нафар ниқобли шахс Вестминстер университети талабасининг уйига бостириб кириб, 25 минг долларни олиб чиқиб кетди

Тошкент шаҳар Шайхонтоҳур тумани ҳудудида 14 ноябрь куни тахминан соат 23:55 да тўрт нафар номаълум шахс Тошкент Халқаро Вестминстер университети талабасининг уйига кириб, 25 минг АҚШ доллари ва бошқа қимматбаҳо буюмларни ўғирлаб кетди. Бу ҳақда UzNews хабар берди.

Шайхонтоҳур тумани ИИБда берилган хабарга кўра, тўрт нафар номаълум шахс жабрланувчиларнинг уйига кириб, пичоқ билан таҳдид қилган. Улар оила аъзоларининг оёқ-қўлларини боғлаб, юз қисмларига жароҳат етказган. Ниқобли шахслар Тошкент Халқаро Вестминстер университети талабасининг тадбиркор отасига тегишли 25 минг АҚШ долларини ўғирлаб кетган.

Шунингдек, талабанинг онасига тегишли бўлган баҳоси тўрт миллион сўмлик уяли алоқа телефонини ҳамда паспортини ҳам ўғирлаган. Жиноятчилар воқеа жойидан яширинишга муваффақ бўлган.

Мазкур ҳолат юзасидан Ўзбекистон Республикаси Жиноят Кодексининг 164-моддаси 4-қисм «а» банди билан жиноят иши қўзғатилган бўлиб, текширув ҳаракатлари олиб борилмоқда.