Ўзбекистон Президенти Шавкат Мирзиёев «Республика олий таълим муассасалари бакалавриатига кириш тест синовларини ўтказиш тартибини такомиллаштириш тўғрисида» қарор қабул қилди. Бу ҳақда ЎзА хабар бермоқда.
Ҳужжатда қайд этилишича, кейинги йилларда тест синовларини ўтказиш тартиб-қоидалари, уларнинг натижаларини эълон қилиш борасида олиб борилаётган ишлар бугунги кун талабларига тўлиқ жавоб бермаяпти. Бу эса жамоатчилик, хусусан, ота-оналарнинг ҳақли равишдаги эътирозларини келтириб чиқармоқда ва ҳар йили уларнинг ушбу масала юзасидан қарийб 4 мингдан ортиқ мурожаати келиб тушмоқда.
Мамлакатда кадрлар тайёрлаш тизимини янада такомиллаштириш, тест синовларини такомиллаштириш, унинг адолатли, холис ва шаффоф ўтказилишини ташкил этиш мақсадида Олий ва ўрта махсус таълим вазирлиги, Халқ таълими вазирлиги, Иқтисодиёт вазирлиги, Молия вазирлиги ва Давлат тест марказининг:
2018/2019-ўқув йилидан бошлаб олий таълим муассасасига қабул қилиш бўйича кириш тест синовларини 1 августдан 15 августгача бўлган даврда ўтказиш;
Тест синовлари натижаларини тест ўтказилган куннинг эртасига Давлат тест маркази расмий веб-сайтида эълон қилиш ҳақидаги таклифлари маъқулланди.
2018/2019-ўқув йилидан бошлаб олий таълим муассасасаларига тест синовлари Тошкент шаҳрида «Ўзэкспомарказ» миллий кўргазмалар мажмуаси павильонлари ҳамда унинг ҳудудида ўрнатиладиган қўшимча йиғма павильонлар, шунингдек, катта сиғимдаги бошқа биноларда, вилоят марказларидаги Олимпия захиралари коллежлари ёки бошқа ташкилотларнинг катта сиғимдаги биноларида ўтказилиши, тест жараёнининг максимал даражада ошкора ва шаффофлигини таъминлаб, видеокузатувлар орқали жамоатчилик, жумладан, абитуриентлар ота-оналарининг онлайн режимида кузатиб боришларига имконият яратилишини таъминлаш топширилди.
Изоҳ (0)