Ўзбекистоннинг олтин-валюта захиралари куз бошидан бери 750 миллион долларга кўпайди ва 1 ноябрь ҳолатига 26 миллиард долларга етди. Бу ҳақда Халқаро пресс-клуб йиғилишида Марказий банк раисининг биринчи ўринбосари Тимур Ишметов маълум қилди, дея хабар беради «Газета.uz».
«Одатда бу рақамлар эълон қилинмас, ошкор этилмайдиган маълумот саналарди. Давлат раҳбари қарорига мувофиқ қатор иқтисодий кўрсаткичлар очиқ манбалар сифатида кўрсатиладиган бўлди. 1 январдан бошлаб ҳар бир муассаса, жумладан, Марказий банк ҳам олтин-валюта захиралари, пул массаси ва барча иқтисодий кўрсаткичларни чоп этиб боради. Бугун олтин-валюта захиралари суммасини расман эълон қиляпмиз», — деди Марказий банк раисининг биринчи ўринбосари.
Ишметовга кўра, валюта сиёсатини либераллаштиришга тайёргарлик чоғида айрим иқтисодчиларни мамлакатда бунинг учун захиралар етарли эканлиги масаласи қизиқтирган.
«Биз уларга ўтган йиллар мобайнида тўпланган олтин-валюта захираларини сарфлаш ниятимиз йўқлигини тушунтиришга уриндик. Курс бозор тамойилларидан келиб чиқиб шаклланишини маълум қилдик. Бу эса курснинг қандайдир даражасини таъминлаш ёки ҳимоя қилиш учун интервенцияларимиз билан аралашмаслигимиз кераклигини англатади. Ижобий натижа қўлга киритилди — илк давр давлат, Марказий банк томонидан валюта ресурсларини йўналтиришсиз ўтди. Бозорга корхоналар валютани харид қилиш ва сотишга тайёр курсни шакллантиришга имкон бериш учун Марказий банкнинг валюта биржасидаги иштироки минимал даражада қолади», — изоҳ берди Ишметов.
Маълумот учун, сентябрь бошидан бери Ўзбекистон банклари 1,55 миллиард долларга тенг валютани сотиб олди. Бундан 644 миллиони жисмоний шахслар (айирбошлаш пунктлари орқали), 915 миллиони эса экспортчиларга тегишли.
Изоҳ (0)