Ўзбекистон Вазирлар Маҳкамаси Адлия вазирлиги ҳузуридаги Тошкент юридик коллежи фаолияти ва таълим-тарбия жараёнини тубдан такомиллаштириш тўғрисидаги қарорни имзолади. Бу ҳақда Адлия вазирлиги ахборот хизматига таяниб, «Газета.uz» хабар берди.
Коллеж ўқувчилари ўртасида келиб чиққан жанжал оқибатида улардан бири ҳаётдан кўз юмганидан сўнг октябр ойи бошида таълим муассасаси директори Наталя Темирова вазифасидан озод этилиб, коллеж маъмуриятига нисбатан талон-тарожликда гумон қилиш бўйича жиноий иш очилган эди. Маълум бўлишича, коллежда ҳодисага қадар хизмат текшируви ўтказилган, қўпол қоидабузарликлар аниқланган.
Ҳукумат қарорига мувофиқ, «коллеждаги муҳитни соғломлаштириш ва мавжуд муаммоларнинг тезкор ечимини топиш мақсадида» коллеж фаолиятини ўрганиш ва уни такомиллаштириш бўйича комиссия ташкил этилди.
Комиссияга бир ойлик муддатда коллежнинг раҳбар ва педагог кадрларини аттестациядан ўтказиш ҳамда коллежни замонавий талабларга жавоб берадиган, юксак малака, профессионал тайёргарлик ва маънавий-ахлоқий фазилатларга эга бошқарув ва педагог кадрлар билан тўлдириш топширилди.
Коллеж Тошкент давлат юридик университети тасарруфига ўтказилди.
Шу билан бирга Тошкент юридик коллежида ўқув жараёнини тубдан яхшилаш, ўқувчиларни ўқитиш сифатини, маънавий-ахлоқий тарбиялаш, уларнинг ҳуқуқий маданияти ва онгини ошириш, шунингдек, коллежнинг моддий-техника базасини мустаҳкамлаш бўйича тадбирлар режаси ҳам тасдиқланди.
Қарорда ўқувчилар қонун ҳужжатларида белгиланган тартиб билан бир қаторда, ўқув интизоми ва коллеж ички тартиб-қоидаларини бузганлиги, шу жумладан, семестр давомида узрсиз сабабларга кўра дарсларни 74 соатдан ортиқ вақт қолдиргани, шунингдек, одоб-ахлоқ қоидаларини бузганлиги учун ҳам Тошкент юридик коллежидан четлаштирилиши белгилаб қуйилди.
Бундан ташқари, қарорда Тошкент давлат юридик университетига университетнинг бюджетдан ташқари маблағлари ҳисобидан коллеж учун ўқув-лаборатория ускуналари, сарфлаш материаллари, компьютер техникаси, дарсликлар ва ўқув қўлланмалари, енгил автотранспорт воситалари сотиб олиш, шунингдек, коллеж ходими ва ўқувчиларини моддий қўллаб-қувватлаш ҳуқуқи берилди.
Изоҳ (0)