Хоразм вилоятининг Қўшкўпир ва Хива туманларида тўртинчи сектор ишчи гуруҳ аъзолари уйма-уй юриб, Қўшкўпир ва Хива туманларида 37,5 мингга яқин фуқаролар билан мулоқот қилди ва икки мингга яқин мурожаатларни қабул қилди. Бу ҳақда Хоразм вилоят давлат солиқ бошқармаси ахборот хизмати хабар бермоқда.
Мазкур мурожаатларда асосан уй-жойга эҳтиёж мавжудлиги, кўп қаватли уйларнинг кириш йўлаклари ва томларини таъмирлаш, газ ва иссиқлик қувурларини янгилаш, болалар ўйин майдончаларини ташкил этиш, мактаб ва боғчаларни таъмирлаш, жиҳозлаш, маиший хизмат кўрсатиш шохобчалари ва кутубхоналарни ташкил этиш, коммунал тўловларни тўлаш, ишга жойлашишда ёрдам бериш каби масалалар ўрин олган.
Бугунга қадар 1470 та мурожаат жойида ҳал этилиб, 237 таси «йўл харитаси» ва дастурларга киритилган, қолган мурожаатлар ишчи гуруҳ томонидан ўрганилмоқда.
Шунингдек, ижтимоий ёрдамга муҳтож ва кўп болали оилаларнинг хонадонларида вилоят тўртинчи секторининг эсдалик кутубхонаси ташкил этилди. Хусусан, Қўшкўпир тумани Шихмахшад қишлоғидан Руслан Қурбонов ҳамда Хива тумани Қушчи Каттабоғ маҳалласида яшовчи Барно Жуманиёзовалар хонадонида фарзандлари учун ташкил этилган болалар кутубхонасидан беҳад мамнун эканлигини билдирган.
Мазкур кутубхоналар болалар адабиёти, бадиий асарлар, ўзбек халқ эртаклари ва маънавий-маърифий йўналишдаги 50 дан ортиқ китоблар билан бойитилган.
Изоҳ (0)