Чилонзор прокуратураси 4 яшар қизини калтаклаб, буни видеога олган отага нисбатан жиноий иш очди

Тошкент шаҳар Чилонзор тумани прокуратураси томонидан 4 яшар қизалоқнинг отаси томонидан калтакланиши воқеаси юзасидан жиноят иши очилган. Бу ҳақда, туман прокуратураси вакилига асосланиб, «Kun.uz» хабар бермоқда.

4 яшар қизалоқ отаси томонидан қаттиқ калтакланиши акс этган видеоёзув 11 ноябрь куни «Ўзбекистон» телеканалининг «Учбурчак» кўрсатувида намойиш этилган, шундан сўнг ижтимоий тармоқларда муҳокамаларга сабаб бўлган эди.

Қизчанинг калтакланиши видеоси айнан ота томонидан олинган — у қизини уриб, ҳақорат қилиши давомида жараённи видеога олиб турган. Маълумотларга кўра, сўнг бу видео ота томонидан қизнинг онасига юборилган.

Туман прокуратураси вакили сўзларига кўра, айни вақтда мазкур ҳолат юзасидан тергов ишлари олиб борилмоқда, бироқ жиноят иши қайси модда бўйича очилганига аниқлик киритилмаган.

Шунингдек, туман ИИБ томонидан жаҳлдор отани қамоққа олиш бўйича санкция бериш масаласи ҳам кўриб чиқилмоқда.