NASA агентлиги 2018 йилда Халқаро космик станцияга HP компаниясининг иккита принтерини жўнатади. Бу сўнгги 17 йил ичидаги принтерларнинг биринчи янгиланиши бўлади. Ҳозирги вақтда ўрнатилган принтерлар 2000 йилнинг ноябрь ойида олиб чиқлган, деб хабар бермоқда TJournal.
Космонавтлар станцияда принтерлардан миссияга оид ҳужжатларни, фотосуратларни ва эвакуация баённомаларини чоп этиш учун фойдаланади. NASAнинг маълумотларига кўра, ХКСда бир ойда мингдан ортиқ саҳифа чоп этилади. 17 йил давомида бу ишни иккита Epson Stylus Color 800 принтери бажарган. Уларнинг бири АҚШ томонида, иккинчиси эса Россия томонидан жойлашган.
Космонавтларнинг сўзларига кўра, 2000 йилда олиб чиқилган принтерлар анчагина эскирган. ХКСга икки марта парвоз қилган америкалик Жон Петтитнинг айтишича, сўнгги беш-олти йил ичида ХКСда принтерлар муаммога айланган.
ХКС менежери Стефан Ҳантернинг маълум қилишича, вақт ўтиш билан принтерлар «музей экспонатлари»га айланган.
NASA 2015 йилда HP компанияси билан бирга принтерларни янгилаш устида иш бошлаган. Бунда амалда мавжуд бўлган модель олинган, бироқ у ХКС шароитларига ва вазнсизлик ҳолатига мослаштирилган. Қурилма параболик парвоз ёрдамида синаб кўрилган.
Янги принтерлар 2018 йилнинг февраль ойида SpaceX миссияси ёрдамида ХКСга етказилади. NASA қурилмаларнинг 2024 йилгача ўзгартирилмаслигига умид қилмоқда. Шу йилда ХКСнинг ишлаш муддати ҳам тугайди.
Изоҳ (0)