«Россотрудничество»нинг Ўзбекистондаги ваколатхонаси Москва зарбхонасида Муқаддас Маккага атаб чиқарилган кумуш маркалар кўргазмасинининг ташкилотчиларидан бирига айланди, деб хабар берди UzDaily.
Шунингдек, лойиҳага «Шарқ аёли» халқаро аёллар жамғармаси, «Рус гуманитар миссияси» нотижорат автоном ташкилоти, Ўзбекистон алоқа тарихи музейи, «Ўзбекистон почтаси» АЖ ва Амир Темур номидаги халқаро хайрия жамғармаси координаторлик қилмоқда.
Кўргазманинг тантанали очилиш маросими 2017 йилнинг 2 ноябрида Ўзбекистон алоқа тарихи музейида бўлиб ўтди. Очилиш маросимида Россия Таълим ва фан вазирлиги статс-секретари — вазир ўринбосари Павел Зенькович, «Россотрудничество»нинг Ўзбекистондаги ваколатхонаси раҳбари Виктор Шулик, Ўзбекистон Республикаси Олий Мажлиси Қонунчилик палатасининг Демократик институтлар, нодавлат ташкилотлар ва фуқароларнинг ўзини ўзи бошқариш органлари қўмитаси раиси Акмал Саидов, Татаристон Республикасининг Ўзбекистондаги вакили Рамил Шакиров, Ўзбекистон ахборот технологиялари ва коммуникациялари вазири ўринбосари Миродил Сангилов, Ўзбекистон Мусулмонлар идораси раиси ўринбосари Абдулазиз Мансур ва бошқалар иштирок этди.
Кўргазмада кумушдан ишланган 40 та марка намойиш этилди. Тўплам WT (Россия) компаниясининг буюртмасига асосан 999 пробали кумушдан ноёб технология асосида тайёрланган. Ушбу тўплам «Муқаддас Макка» мавзусида бирлаштирилган ва турли йилларда 24 та ислом давлатида чиқарилган почта маркалари асосида яратилган. Шу билан бирга, кўргазмада Қуръоннинг кумушдан ишланган бир вароғи ҳам намойиш этилган.
Изоҳ (0)