Ўз вақтида АҚШнинг Ўзбекистондаги элчихонасида фаолият олиб борган, хусусан, жамоатчилик билан алоқаларга масъул бўлган америкалик дипломат Марк Аскуино Нью-Йоркда 31 октябрь куни юз берган теракт юзасидан ўз фикрларини билдирди. У ўз фикрларини Facebook’даги саҳифасида ёзиб қолдирди.
Айни вақтда, Марк Аскуино Facebook’даги муносабати давомида АҚШ президенти Дональд Трампни ҳам билвосита танқид остига олган. Трамп, Нью-Йоркдаги теракт ва уни содир этган шахснинг келиб чиқишидан фойдаланиб, «Грин кард» виза лотереясини тўхтатиш ташаббусини зўр бериб илгари сурмоқда.
Ўзбекистон номи — янгиликларда. Аммо, афсуски, бунга ижобий воқеалар сабаб эмас. Оммавий ахборот воситалари автомашина воситасида амалга оширилган ва саккиз кишининг ҳаётига зомин бўлган кечаги мудҳиш ҳужум ҳақида ёзаркан, қотилнинг Ўзбекистондан (қонуний йўл билан) кўчиб келганига урғу бермоқда.2001 йил 11 сентябрь фожиаси юз берган вақт мен Тошкентда эдим. Ўшанда АҚШда бўлган фожиа ортидан ўзбекистонликларнинг бизга билдирган ҳамдардлиги ва кўрсатган меҳр-оқибатини ҳеч қачон унутмайман. Теракт юз берганидан кейинги бир неча соат ичида Америка элчихонаси гуллар-у ҳамдардлик мактубларига тўлиб кетган. Ўзбекистонликлар мен ва рафиқам билан кўришганда бу мудҳиш воқеадан афсусда эканликларини билдиришарди. Қурбон бўлганлар орасида ўзбекистонликлар ҳам бор эди.
Мен илиқ хотиралар билан ёдга оладиган Ўзбекистон ҳурматга лойиқ ажойиб инсонларга тўла. «Грин кард» виза лотереяси кўплаб ўзбекистонликларнинг бу ерга кўчиб келишига, ўзининг меҳнаткашлиги, ватанпарварлиги ҳамда маданияти билан ранг-баранг жамиятимизни янада бойитишига имкон берди. Ақлдан озган бир шахснинг қилмишини унга алоқадор бутун бир миллатга боғлаш нотўғри. Шунингдек, виза лотереясига рахна солиш мақсадида бу воқеага сиёсий тус бериш ҳам шармандаликдир.
Марк Аскуино, Ўзбекистонда ишлаган америкалик дипломат
Изоҳ (0)