Мирзо Улуғбек тумани ҳокимлиги боғча ҳудудида автотураргоҳ қурмаётгани ҳақида баёнот берди. Лекин автотураргоҳ барибир боғча ҳудудида қурилмоқда

Тошкентнинг Мирзо Улуғбек туманида жойлашган 232-сонли мактабгача таълим муассасасининг ҳудудида автотураргоҳ барпо этилаётгани ҳақида «Правда Востока» нашри эълон қилган хабарга Мирзо Улуғбек тумани ҳокимлиги Facebook орқали муносабат билдирди, «Правда Востока» постнинг скриншотини ўз хабарига илова қилди.

«Сизга маълумки, бугунги кунда бутун шаҳар бўйлаб ёпиқ турдаги гаражларни бузиш ишлари олиб борилмоқда, уларнинг ўрнига эса замонавий очиқ автотураргоҳлар қурилмоқда», — дейилади ҳокимлик хабарида.

Қайд этилишича, Вазирлар Маҳкамасининг Мирзо Улуғбек туманини 2017—2019 йилларда комплекс ривожлантириш ҳақидаги қарорига мувофиқ, Т. Малик кўчасида жойлашган ёпиқ гаражларни бузишга қарор қилинган.

Бузилишдан олдин гаражлар эгалари учун иккита автотураргоҳ ташкил қилинган. У ерда бузилаётган гаражлар эгалари учун бепул асосда жой ажратилади.

«Шунга эътиборингизни қаратамизки, автомобиль тўхташ майдонлари 232-мактабгача таълим муассасаси ҳудудида эмас, балки унинг ёнида ташкил қилинмоқда, шаҳарсозлик қоидаларига кўра, тураргоҳдан MTMгача бўлган масофа 15 метрдан кам бўлмаслиги керак», — дея таъкидланади хабарда.

«Шу билан бирга, қайд этиш керакки, ушбу пост автотураргоҳлар билан боғлиқ муаммони фош этди, бу тураргоҳларнинг турар-жойларга яқин эканлиги, ҳовли ва тротуарлардаги тартибсиз тураргоҳлар, ушбу соҳада тизимли режалаштиришнинг йўқлиги каби муаммолардир», — дейилади ҳокимлик баёнотида.

Хабарда «ҳурматли экспертлар»га «муаммо моҳиятини тушуниб етмасдан туриб, танқид тошларини отиш нотўғри эканлиги» айтилди.

«Биз ҳеч қачон мавжуд муаммоли саволлардан қочмаймиз, аксинча, соғлом танқид ва ҳамкорликдаги ечимга тайёрмиз ва очиқмиз», — дея таъкидланади хабарда.

Газета таҳририяти ҳокимликнинг бу жавобига қуйидагича муносабат билдирган:

Ҳокимлик масъул ходими Алишер Сулейманов юқорида келтирилган матн Мирзо Улуғбек тумани ҳокимлигининг расмий жавоби эканлигини тасдиқлади.

Мирзо Улуғбек тумани ҳокимлиги қураётган автотураргоҳнинг бир қисми 232-болалар боғчаси ҳудудида жойлашган. Мухбиримиз яна бир бор ушбу манзилда бўлиб, боғчанинг кадастр ҳужжатлари билан танишди. Ушбу кадастр 2007 йилда тузилганлиги рост. Демак, автотураржой учун тортиб олинаётган ер болалар боғчасига тегишли.

«Муаммони чуқур ўрганмасдан туриб танқид қилиш» борасида эса мухбир эмас, ҳокимлик вакиллари ўйлаб кўришса адолатдан бўларди.