«Ижтимоий фикр» жамоатчилик фикрини ўрганиш маркази томонидан 2017—2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини амалга оширишга оид Давлат дастурига мувофиқ «Жамоатчилик фикри кўзгусида суд-ҳуқуқ тизими ислоҳоти» мавзусида ижтимоий сўров ўтказилди. Бу ҳақда ЎзА хабар бермоқда.
Сўров натижаларига кўра, Ўзбекистон фуқароларининг аксарияти, яъни 89,6 фоизи суд-ҳуқуқ тизимида амалга оширилаётган ислоҳотлар фуқаролар ҳуқуқи, эркинлиги ва қонуний манфаатларини таъминлаш, ҳуқуқий ва демократик давлат барпо этишнинг асосий кафолати сифатида қонун устуворлиги тамойили мустаҳкамланишига катта ишонч билан қарайди.
69,7 фоиз иштирокчи суд-ҳуқуқ тизимидаги ўзгаришларнинг ижобий самараси жамият ва давлат ҳаётининг кўплаб жабҳаларига дахлдор эканини таъкидлаган. Сўров давомида фуқаролар жиноятчиликнинг олдини олиш ва бартараф этиш, бизнесни ривожлантириш соҳасида ҳуқуқни таъминлаш, тадбиркорлар манфаатини ҳимоя қилиш ва ишбилармонлик муҳитини янада яхшилаш масалаларини суд-ҳуқуқ тизимидаги ислоҳотлар билан боғлиқ тарзда юз берган ижобий ўзгаришлар сифатида қайд этган.
Ҳар учинчи респондент аҳолининг суд-ҳуқуқ тизимидаги ислоҳотлардан етарли даражада хабардор эмаслиги, ҳуқуқий маданият ва ҳуқуқий таълим даражаси замон талабларига жавоб бермаслиги соҳада муваффақиятли ўзгаришларни амалга ошириш йўлидаги жиддий тўсиқдир, деб ҳисоблайди.
Сўров аҳоли ҳуқуқлари ва қонуний манфаатлари ҳар қандай тажовуздан ҳимояланганини кўрсатди. Аксарият, яъни 93,8 фоиз респондент ўзини ҳуқуқий жиҳатдан ҳимояланган, деб ҳисоблайди.
Иштирокчиларнинг 67,1 фоизи ўз манфаатларини ҳимоя қила олиши ва бузилган ҳуқуқлари қонуний йўл билан тикланишига эриша олишига қатъий ишонади. Мониторинг натижаларига кўра, 2015 йилдан 2017 йилгача бўлган муддатда ўз қонуний ҳуқуқ ва манфаатларини тиклай олишига қатъий ишонган фуқаролар фоизи барқарорлиги сақланиб қолмоқда.
Жамоатчилик фикрини ўрганиш натижаларига кўра, Ўзбекистон аҳолисининг аксарияти (93,2 фоизи) мамлакатда ўлим жазоси бекор қилинганини маъқуллайди ва қўллаб-қувватлайди.
Изоҳ (0)