19 октябрь куни Ўзбекистон Республикаси Соғлиқни сақлаш вазирлигининг навбатдан ташқари ҳайъат йиғилиши бўлиб ўтди. Бу ҳақда вазирлик ахборот хизмати хабар бермоқда.
Унда Қорақалпоғистон Республикаси Соғлиқни сақлаш вазири, Тошкент шаҳар Соғлиқни сақлаш Бош бошқармаси ва вилоятлар Соғлиқни сақлаш бошқармаси бошлиқлари, Республика миқёсидаги даволаш-профилактика муассасаси раҳбарлари, илмий текшириш институтлари ҳамда ихтисослаштирилган тиббиёт марказлар директорлари иштирок этди.
Йиғилиш соғлиқни сақлаш вазири Алишер Шодмонов раислигида ўтказилди.
Ҳайъат йиғилиши давомида мурожаатлар билан ишлаш, ижро интизоми, аҳолининг репродуктив саломатлигини мустаҳкамлаш, оналик ва болалик муҳофазаси, тиббиётнинг хусусий секторини ривожлантириш каби долзарб масалалар танқидий таҳлил қилинди.
Йиғилиш якунида жойларда аҳоли саломатлигини янада яхшилаш, ҳар бир оилага кириб бориш ва мулоқот ўрнатишга қаратилган ишларни тизимли ташкил қилиш борасида муҳим вазифалар белгиланди.
Тиббиёт ходими фаолияти самараси халқ фикри орқали баҳоланадиган тизим шакллантириш, бунда тиббиётнинг барча бўғини, айниқса бирламчи тиббий-санитария хизматига алоҳида эътибор қаратиш таъкидланди.
Ўзбекистонда қабул қилинаётган меъёрий ҳужжатларда белгиланган вазифалар ўз вақтида, сифатли бажарилишида Соғлиқни сақлаш вазирлиги тизимидаги ҳар бир ходим масъулиятни чуқур ҳис этиб ишлаши лозимлиги, асосий мезон — халқ розилиги экани қайд этилди.
Барчамиз гувоҳи бўлиб турибмиз, шу ўтган қисқа вақт ичида Президентимиз тиббиёт ходимлари билан тўрт маротаба учрашув ўтказди. Ушбу йиғилишларнинг ҳар бирида барчамизни ўйлантираётган, халқимизнинг ҳақли эътирозларига сабаб бўлаётган долзарб масалалар кўтарилди. Тўғри, ҳаракатларимиз натижасиз кетмади. Халқимизнинг саломатлик кўрсаткичларида ишимиз самараси кўринмоқда. Аммо энди хонада ўтириб, ҳисобот ва рақамларга таяниб иш кўришимиз мумкин эмас. Бундай ишлаш мезони халқни қониқтирмайди. Фаолиятимизнинг баҳосини халқимиз бериши керак. Мана шу тизим бизнинг ҳақиқий юзимиз — ишимизнинг кўзгуси бўлади.Алишер Шодмонов, Ўзбекистон Республикаси Соғлиқни сақлаш вазири
Изоҳ (0)