Уч ёшли ўзбек қизи — Марям Америкадаги қорилар мусобақасида иккинчи ўринни олди

2017 йилнинг 7 октябрида Америка Қўшма Штатларининг Вашингтон штати Редмонд шаҳрида Қуръони Каримни чиройли ва тўғри тажвид қоидалари билан ёд олиш бўйича навбатдаги мусобақа бўлиб ўтди, деб хабар берди «Azon.uz».

Унда 2 ва 18 ёш оралиғидаги болалар ва 18 ёшдан катталар ҳам иштирок этиб, ўз билимларини синаб кўришди. Мусобақа иштирокчилари ёшларига қараб бир нечта гуруҳга ажратилган ҳолда синовдан ўтишди.

14 октябрда ушбу бўлиб ўтган мусобақа натижалари эълон қилиниб, ғолиблар тақдирландилар.

Маълум бўлишича, беллашувда бу сафар ўзбек қизалоғи — Марям ҳам иштирок этиб, 5 ёшгача бўлган қарийб 30 нафар иштирокчи ичидан 100 дан 98 балл билан 2-ўринни қўлга киритган.

Марямнинг ота-онаси «Azon.uz»га хабар беришича, қизалоқ яқиндагина 3 ёшни қарши олган. Лекин ёш бўлишига қарамасдан мусобақада иштирок этиб, ҳайъат аъзоларини ўз билими билан лол қолдирган. Марям ўзининг бу ютуғи билан Редмонд масжиди имоми бўлмиш Имом Набеэлнинг олқишига сазовор бўлди.