2017 йил 17 июль куни қабул қилинган Ўзбекистон Республикаси Вазирлар Маҳкамасининг «Рақамли телеешиттиришларга ўтиш ва ер усти аналог телеешиттиришларни тўхтатишга доир амалга ошириладиган чора-тадбирлар тўғрисида»ги қарорига мувофиқ, 2017 йил охиригача Республиканинг барча ҳудудларида 90 комплект юқори қувватли ва 404 комплект кам қувватли рақамли телеешиттириш узаткичларини ўрнатиш ва фойдаланишга топшириш ҳисобига барча аҳоли пунктлари рақамли телеешиттиришлар билан қамраб олинишини таъминланади. Бу ҳақда Тошкент радиотелеузатиш маркази хабар бермоқда.
Шунингдек, аҳоли рақамли телеешиттиришлар хизматларидан кенг фойдаланишини, шу жумладан хорижий сунъий йўлдош алоқаси оператори йўлдош сегментини ижарага олиш ҳисобига давлат телерадиодастурларининг умумфойдаланиладиган ижтимоий пакетини республиканинг узоқ ва бориш қийин бўлган аҳоли пунктларигача етказишни таъминлаш назарда тутилган.
Мазкур қарорда Ўзбекистонда ер усти аналог телеешиттиришларни босқичма-босқич тўхтатиш жадвали тасдиқланган бўлиб, унга кўра, келгуси йилнинг 15 январидан бошлаб 5 декабрига қадар бутун Республика бўйлаб аналог форматдаги барча телеешиттиришлар тўхтатилади.
Жумладан, 2018 йил апрель ойида Сирдарё вилоятидаги (Гулистон), июль ойида Тошкент шаҳридаги ва январь ойида Тошкент вилоятидаги (Ангрен, Чорбоғ, Шоугаз ва Бекобод) юқори қувватли ҳамда июль ойидан бошлаб Тошкент вилоятининг узоқ ва бориш қийин бўлган (тоғли) ҳудудларидаги кам қувватли аналог телеузаткичлари ўчирилиши режалаштирилмоқда.
«Телевизор харид қилаётганда, ушбу телевизорда DVB-T2 стандартида ишлайдиган тюнер бор-йўқлигига эътибор қаратиш лозим. Маҳсулотнинг техник тавсифида бу ҳақида батафсил ахборот берилган бўлади. Бундай телевизор рақамли телевидениега уланиш учун ортиқча қурилмаларни талаб қилмайди», — дейилади хабарда.
Изоҳ (0)