9 октябрь куни Миробод туман жиноят ишлари бўйича судида Боровский номидаги коллеж ўқувчиси Жасур Иброҳимовнинг иши юзасидан яна тўрт нафар гувоҳ, жумладан, кўрсатма берган суд-тиббиёт эксперти Фарҳод Лочинов ҳам тингланди, деб хабар берди «Новости Узбекистана».

Фарҳод Лочинов ўзининг кўрсатмасида қайд этишича, марҳум Жасур Иброҳимовнинг жасади 1 июнь куни ёриб кўрилган. Суд-тиббиёт экспертининг фикрича, ўсмирнинг ўлимига 3 май куни олинган жароҳати сабаб бўлган.

«Суд-тиббиёт экспертизасининг хулосасига кўра, ўсмирнинг ўлимига ўн икки бармоқли ичакнинг ёрилиши, ички органлар гематомаси, кўп сонли жароҳатлар, бошдаги ёпиқ жароҳат ва мия чайқалиши сабаб бўлган. Етказилган тан жароҳатлар даражасига кўра, инсон ҳаёти учун хавфли ҳисобланади. Ёриб кўриш шуни кўрсатдики, боланинг ўлимига 3 май кун олган жароҳатлари сабаб бўлган», — деди Фарҳод Лочинов.

Шунингдек, суд-тиббиёт экспертининг маълум қилишича, Жасур Иброҳимов мутлақо жисмоний жиҳатдан ҳам, руҳий жиҳатдан ҳам соғлом бўлган. Йигитчанинг ҳеч қандай сурункали ёки руҳий касаллиги бўлмаган. Лочинов бу орқали Жасур Иброҳимовнинг ногиронлиги ёки қандайдир жароҳати борлиги ҳақидаги маълумотни рад этган.

Эксперт судьяларнинг, давлат қораловчисининг ва адвокатлар томонидан «марҳум юқорида санаб ўтилган жароҳатларни ўз бўйи баландлигидан йиқилиши ва унинг устига бошқа бир одам қулаши оқибатида олган бўлиши мумкинми» дея берилган саволга «бунинг эҳтимоллиги жуда кам», дея жавоб берди. Шу билан бирга, аниқлик учун тажриба ўтказиб кўриш лозимлигини айтди.

Ўша куни суд-тиббиёт экспертидан ташқари яна уч нафар гувоҳнинг — судланувчининг отасини, шунингдек, тиббиёт коллежи битирувчилари Темур Тўхтаев ва Дилшод Абдуллаевнинг кўрсатмалари тингланди.