Лас-Вегасдаги қирғин айбдори Стивен Пэддок ўзини «дунёдаги энг зўр видео-покер ўйинчиси» дея атаган ва суткасига 14 соат, йилда 365 кун қимор ўйнаган. Бу ҳақда CNN телекомпаниясига асосланиб, «ТАСС» хабар берди.
CNN Пэддок 2013 йилда Лас-Вегасдаги Cosmopolitan казиносидан нохуш ҳодиса учун 100 минг доллар талаб қилган суд ишидаги эътиборли лавҳаларни тақдим этди. «Нега мен ўзимни дунёдаги энг яхши видео-покер ўйинчиси деб ҳисоблайман? Чунки мен видео-покер ўйновчи айрим катта «ўйинчилар»ни биламан. Ҳеч ким мен каби кўп ва узоқ ўйнамайди», — дейилади Пэддокнинг 87 варақдан иборат суд ишида.
«Мен туни бўйи ўйнайман. Кундузи эса ухлайман», — деган эди Пэддок. Америкаликнинг таъкидлашича, у битта ўйинда 100 доллардан 1350 долларгача, бир кечада 1 миллион долларгача ютиб олган.
Cosmopolitan юрисконсульти Марти Кравицнинг маълум қилишича, Пэддок 2011 йилнинг 30 октябрида меҳмонхонадаги сувенирлар дўконидан казинога чиқаётиб йиқилиб тушган ва жароҳат олган. 2012 йилда америкалик ушбу ўйин муассасасини судга бериб, тиббий муолажалар учун сарфлаган харажатлари учун 32 минг доллар, шунингдек, етказилган жисмоний ва маънавий зарар учун умумий миқдорда 100 минг доллар талаб қилган. Суд судланувчининг фойдасига қарор чиқарган.