Россия фуқаролари Роман Заболотной ва Григорий Цурканунинг ИШИД террорчилари томонидан асирга олингандан кейинги ҳолати акс этган видеоёзув эълон қилинди, дея хабар бермоқда Meduza. Видеони Conflict Intelligence Team тадқиқот гуруҳи аниқлади.
Роликда Роман Заболотной ўзининг рус эканлигини, «маълумот билан штабга кетаётган бўлгани»ни айтган. Унинг ёнида яна икки асир ўтирибди, улардан бири Григорий Цуркану деб тахмин этилмоқда. У юзи боғлаб қўйилган ҳолатда автомобиль кузовида ўтирибди. Яна бир асир эса суриялик бўлиши мумкин.
Аввалроқ Давлат думаси депутати ИШИД жангарилари ўзларига асир тушган Россия фуқаролари Роман Заболотной ва Григорий Цуркануни ўлдирганини маълум қилган эди.
Эслатиб ўтамиз, ОАВларда ИШИД асирга олинган икки россиялик ҳарбий акс этган видеони эълон қилгани ҳақида ахборот пайдо бўлган эди. Кейинроқ эса Россия мудофаа вазирлиги икки нафар россиялик ҳарбий ИШИД жангарилари томонидан асирга олинганини рад этганди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.