Ўзбекистонлик боксчи Фазлиддин Ғоибназаров 9 декабрь куни америкалик Стивен Ортизга қарши рингга чиқади, деб ёзди «Оламспорт».
Ғоибназаров профессионал боксдаги дастлабки икки жангида ғалаба қозонишга муваффақ бўлганди. Унинг 24 ёшли навбатдаги рақиби эса 7 та жанг ўтказиб, уларнинг барчасида ғалаба нашидасини сурган. 2 та жангда рақибларини нокаутга учратган.
Стивен Ортиз сўнгги бор 24 июнь куни рингга чиққан бўлиб, Тайром Жонсни очколар ҳисобига кўра мағлуб этганди. Унинг ўзбекистонлик чарм қўлқоп устасига қарши жанги Нью-Йоркдаги Madison Square Garden аренасида ўтади. Бокс кечасининг марказий жангида украиналик жаҳон чемпиони Василий Ломаченко рингга кўтарилади.
9 декабрь куни Фазлиддин Ғоибназаров россиялик 35 ёшли Андрей Климов билан жанг ўтказиши керак эди. Бироқ спортчи бу жангдан воз кечганди.