Туркия расмийлари Германия билан муносабатларни яхшилашга тайёр эканлигини маълум қилди

Туркия Германия билан муносабатларни яхшилашга тайёр. Бу ҳақда мамлакат ташқи ишлар вазири Мавлуд Чавушўғли маълум қилди, дея хабар беради «РИА Новости».

«Бунинг учун барча чораларни кўришга тайёрман. Германия ва Туркия ўртасида, ҳатто ўтган йил мураккаб кечган бўлса ҳам, муаммолар учун сабаб йўқ», — таъкидлади Чавушўғли Spiegel журналига берган интервьюсида.

Вазирга кўра, Анқара ва Берлин ўртасида биринчи галда 2017 йил апрелида бўлиб ўтган ва Туркия конституциясига мамлакатда бошқарувнинг парламентдан президентлик шаклига ўтилишини кўзда тутувчи тузатишлар киритилишига олиб келган референдум билан боғлиқ келишмовчиликлар бўлган.

«Референдумга тайёргарлик чоғида Туркия ҳукумати вакилларига Германияда чиқиш қилиши тақиқлангани бизга ёқмади. Бироқ мен Германия ташқи ишлар вазири, дўстим Зигмар Габриэлга айтдим: кел, биргаликда келажакка кўз ташлайлик. Агар сизлар биз томон бир қадам қўйсангиз, биз сиз тарафга икки қадам қўйишга тайёрмиз», — деди Туркия ТИВ раҳбари.