Қирғизистон президенти Алмазбек Атамбаев қўшни Қозоғистон расмийларини республиканинг ички ишлари, жумладан, 15 октябрда бўлиб ўтадиган президентлик сайловларига аралашишда айблади. Бу ҳақда «РИА Новости» хабар бермоқда.
Сентябрь ойи охирида Қозоғистон президенти Нурсултон Назарбоев Қирғизистон президентлигига номзодлардан бири, собиқ бош вазир Омурбек Бабанов билан учрашганидан сўнг икки давлат ўртасида дипломатик можаро юзага келди. Бишкек Остонани «халқ танловига таъсир қилиш»га уринишда айблади.
«Барибир адолатли сайловлар ўтказилишини таъминлайман. Қозоқ расмийлари нега бизга ўз номзодларини тиқиштираётганини тушуниб турибман. Улар Бакиевни (Курманбек Бакиев Қирғизистоннинг собиқ президенти. 2005 йилдан 2010 йилгача ҳукумат тепасида бўлган) яхши кўради, Бакиевлар ҳозиргача Қозоғистонда байрамларини нишонлаб келади», — деди Атамбаев.
У Назарбоев Бабанов билан учрашувда билдирган Қирғизистонга ёш президент зарурлиги ҳақидаги фикрларни келтириб ўтди.
«Энг ёши катта номзод ҳам Назарбоевдан 20 ёш кичик. Мен —16 ёш. Навқирон президентга кимга керак ўзи: бизгами ёки Қозоғистонга?» — таажжубланди Атамбаев.
Қирғизистон раҳбари президентлик муддати якунланишига атиги 1,5 ой қолганини эслатди.
«Агар қўшниларимиз ўзларига келиб олмасалар, бошқача гаплашамиз. Мен адолатли, ҳалол президент сифатида намуна кўрсатганимдан фахрланаман», — таъкидлади Қирғизистон президенти.
Изоҳ (0)