Бишкек ва Ўшда «Ойқиз эртаги» фильми намойиш этилади

2017 йил 5—8 октябрь кунлари Қирғизистонда Ўзбекистон маданияти кунлари бўлиб ўтади. Ушбу тадбирда иштирок этиш учун Қирғизистонга Ўзбекистон маданияти ва санъатининг бир гуруҳ вакиллари йўл олди. Улар орасида ўзбек кинематографияси намоёндалари ҳам бор, деб ёзади «Ўзбеккино» Миллий агентлиги матбуот хизмати.

Бишкек ва Ўш шаҳарларида ўтказиладиган Ўзбекистон маданияти кунлари доирасида расмий учрашувлар ҳамда «Замонавий Ўзбекистон» номли тасвирий санъат ва фото кўргазма, концерт дастурлари ва «Ўзбекфильм» киностудиясида суратга олинган, кинорежиссёр Акбар Бектурдиевнинг «Ойқиз эртаги» бадиий фильми тақдим этилади.

2016 йилнинг 20 майидан экран юзини кўрган «Ойқиз эртаги» тарихий эртак фильмини яратишда замонавий технологиялар, компьютер графикасидан кенг фойдаланилган. Киноасарда ватанни севиш, унинг дахлсизлигини кўз қорачиғидек асраш, мардлик, ҳалоллик, ёвузликка қарши кураш сингари эзгу ғоялар улуғланган.

Бош ролларни таниқли ёш актёрлар Йигитали Мамажонов ва Юлдуз Ражабова ижро этган. Фильм сценарийси муаллифи — Муҳаммад Давлатиллоҳ, режиссёр — Акбар Бектурдиев.