Қозоғистондаги ёқилғи қуйиш шохобчаларидан АИ-92 бензини ғойиб бўлди

Қозоғистон АЁҚШларидан энг оммабоп автомобиль ёқилғиси — АИ-92 бензини ғойиб бўлди. Экспертлар танқисликни маҳаллий ишлаб чиқариш етарли эмаслиги ва давлат томонидан жиддий назорат ўрнатилмагани билан изоҳламоқда, дея хабар беради «РИА Новости».

Ҳозирда АИ-92 бензинини нақд пулга фақат бир брендга тегишли АЁҚШларда сотиб олиш мумкин. Бошқа компаниялар станцияларида унинг миқдори чекланган ёки фақат талон ва ёқилғи карталари орқали сотилмоқда. 

Нефтьгаз бозори эксперти Сергей Смирновга кўра тегишли идоралар томонидан қаттиқ назорат ўрнатилмагани ёқилғи танқислигига олиб келмоқда. Қозоғистондаги нефтни қайта ишлаш заводларида бензин етарли даражада ишлаб чиқарилмаслиги ҳам бунга сабаб бўлмоқда. Мамлакат бензиннинг 30, дизель ёқилғисининг 15 фоизини Россиядан импорт қилади. 

Эслатиб ўтамиз, олдинроқ Қозоғистонда яна бензин қимматлагани маълум қилинганди.