Республика шошилинч тиббий ёрдам илмий марказида табиий аммиакда ишловчи ҳавони совутишнинг қайта янгиланган марказлашган тизими ишга туширилди. Соғлиқни сақлаш вазирлиги ахборот хизмати хабарига кўра, умумий қиймати 500 минг долларни ташкил этган бу лойиҳани амалга оширишга тайёргарлик бир йилдан ортиқ давом этиб, бир неча босқичда ўтди.
Марказий Осиёда ягона ҳисобланган ушбу тизимнинг афзаллиги — у ҳавони марказлаштирилган ҳолда ва, энг муҳими, экологик жиҳатдан тоза усулда совутиб беради.
Совутишнинг бундай усулига ўтиш ҳозирда ривожланган давлатларда жадаллик билан татбиқ қилинмоқда. Ушбу тизимнинг инсон саломатлигига зарари камлиги ва озон қатлами ҳамда иқлим ўзгаришига хавф солмайдиган экологик соф технология эканлиги аҳамиятлидир.
Ёзда беморлар парваришидаги асосий омиллардан бири бу — ҳаво ҳароратини назорат қилиб боришдир. Республика шошилинч тиббий ёрдам илмий маркази 800 ўринга мўлжалланган бўлиб, эскирган совутиш тизими сабаб, иссиқ мавсумда беморлар учун керакли шароитни экологияга зарар етказмай яратиш муаммоларга сабаб бўлаётган эди. Янги лойиҳа айни шу масалага ечим сифатида жорий этилмоқда.Республика шошилинч тиббий ёрдам илмий марказида татбиқ этилган ушбу лойиҳа Монреал протоколи талабларига кўра ишга туширилди. Ўзбекистон 1993 йилдан буён Монреал протоколи юзасидан олинган мажбуриятларни муваффақиятли бажариб келмоқда.Абдуҳаким Хаджибаев, Ўзбекистон соғлиқни сақлаш вазирининг ўринбосари — Республика шошилинч тиббий ёрдам илмий маркази бош директори
Ушбу протокол талабларига кўра, унга аъзо мамлакатлар хлор, фтор, углерод синфига мансуб хладагентларнинг кимёвий моддаларини истеъмолдан чиқариб ташлаш, сўнг босқичма-босқич улардан фойдаланишни қисқартириш, 2030 йилга келиб мазкур синфга мансуб бўлган барча хладагентларни истеъмолдан чиқариш мажбуриятини олган.
Маълумот учун, озон қатламининг юпқалашиб кетиши муаммосини ҳал этиш мақсадида 1985 йил 147 мамлакат иштирокида Озон қатламини ҳимоя қилиш тўғрисидаги Вена конвенцияси қабул қилинган. 1987 йил 16 сентябрь куни Озон қатламини бузувчи моддаларга доир Монреал протоколи имзоланган.
Ўзбекистон Экология ва атроф-муҳитни муҳафаза қилиш давлат қўмитаси, БМТ Тараққиёт дастурининг Ўзбекистондаги ваколатхонаси ҳамда Глобал экологик жамғарма ҳамкорлигида «Иқтисодиёти ўтиш давридаги мамалакатлар ҳудудида гидрохлорфторуглеродлардан фойдаланишни жадал қисқартиришнинг бирламчи бажарилиши – Ўзбекистон» лойиҳаси амалга оширилмоқда.
Озон емирувчи моддалардан фойдаланишни қисқартиришга қаратилган ушбу ҳамкорликдаги лойиҳанинг асосий йўналишларидан бири – ҳавони совутиш ва кондиционерлаш тизимида муқобил хладагентлар қўлланилган лойиҳаларни амалга ошириш ҳисобланади.
Изоҳ (0)