Олий Мажлис Сенатининг 12-ялпи мажлисида сенаторлар томонидан маъқулланган «Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонун Давлат ветеринария қўмитасининг ҳуқуқий асоси бўлди, дея хабар бермоқда ЎзА.
Президент Шавкат Мирзиёевнинг 1 июндаги «Давлат ветеринария хизмати бошқаруви тизимини тубдан такомиллаштириш чора-тадбирлари тўғрисида»ги фармони билан Қишлоқ ва сув хўжалиги вазирлиги ҳузуридаги Давлат ветеринария хизмати Давлат ветеринария қўмитасига айлантирилган эди.
Фармон талабларидан келиб чиқиб ишлаб чиқилган янги қонун билан айрим қонун ҳужжатларига ўзгартиришлар киритилмоқда. Хусусан, «Ветеринария тўғрисида»ги, «Аҳолини сил касаллигидан муҳофаза қилиш тўғрисида»ги ва «Озиқ-овқат маҳсулотининг сифати ва хавфсизлиги тўғрисида»ги қонунлар шулар жумласидан.
Мавзуга доир: Мажбурий ижро бюроси сабаб Ўзбекистоннинг 9 кодекси, 10 га яқин қонунларига ўзгартиш ва қўшимчалар киритилди
Бундан ташқари, мазкур қонун соҳада илмий, услубий ва таълим салоҳиятини ривожлантириш, илмий тадқиқотлар йўналишларини белгилаш, фундаментал ва амалий тадқиқотлар, инновация ишланмалари натижаларини ветеринария амалиётига жорий этишда ҳуқуқий асос бўлиб хизмат қилади.
Изоҳ (0)