Мажбурий ижро бюроси 2017 йилнинг 26 сентябрь куни Нукус шаҳрида жойлашган «Габит курилис сервис» МЧЖга қарашли ғишт ишлаб чиқариш цехида текшириш ўтказганда МЧЖ раҳбари Н.Шинтасов томонидан газ тармоқларига ноқонуний равишда уланиш ҳолатлари аниқланиб, расмийлаштирилган. Бу ҳақда Қорақалпоғистон ахборот агентлигига таяниб, «KRuz.uz» хабар берди.
Мазкур жамият раҳбари Н.Шинтасов аниқланган ушбу зарарни камайтириб кўрсатиш эвазига текшириш гуруҳи раҳбарига 50 миллион сўмни пора таклиф қилган ва бу пора бериш бўйича таклифлари аудиотасмага ёзиб олинган.
Ушбу ҳолат юзасидан текшириш гуруҳи мутасадди органларга хабар қилган ва Қорақалпоғистон Республикаси прокуратураси ва Мажбурий ижро бюросининг Қорақалпоғистон Республикаси бошқармаси ходимлари томонидан ўтказилган тезкор тадбир натижасида «Габит курилис сервис» жамияти раҳбари Н.Шинтасов катта инспектор К.Жумагуловга унинг бошқарувида бўлган автомашинасида 50 миллион сўмнинг бир қисмини долларда ҳисоблаб, жами 2500 АҚШ долларини пора тариқасида тақдим қилаётган пайтда қўлга олинган.
Мазкур ҳолат юзасидан, «Габит курилис сервис» жамияти раҳбари Н.Шинтасовга нисбатан Ўзбекистон Республикаси Жиноят Кодексининг 211-моддаси 2-қисми «б» банди билан жиноят иши қўзғатилиб, у Жиноят-процессуал кодексининг 221-моддаси тартибида ушланган.
Ҳозирги кунда мазкур жиноят иши юзасидан дастлабки тергов ҳаракатлари олиб борилмоқда.
Изоҳ (0)