Ўзбекистонлик ёш келин-куёв тўйи куни меҳрибонлик уйлари болалари учун байрам уюштирди. Бу ҳақда Facebook’даги оммабоп гуруҳларда фотохабарлар қолдирилган.
Хабарларда куёвнинг исми Беҳзод, келиннинг исми эса Дилафруз экани маълум қилинган. Тўй қачон, қаерда бўлганига аниқлик киритилмаган.
Суратларда тўйхонага йиғилган кўп сонли болаларни кўриш мумкин. Бир суратда ёш келин-куёв қўлида болалар билан акс этган.
Facebook’даги фотохабарлар остида изоҳ қолдирганлар ёшларнинг меҳрибонлик уйи тарбияланувчиларга кўрсатган меҳрибончилигини олқишлаган. «Баракалла!», «Бахтли бўлинглар!» каби комментларни кўплаб учратиш мумкин.
«Куёв боланинг онаси ўғил туғиб, эркак қилиб тарбиялапти. Аввало ота-онасига раҳмат!», — деб ёзган фойдаланувчилардан бири. У каби келин-куёвнинг ота-онасига раҳмат айтганлар кўплаб топилади.
«Баракалла, бунақаси ҳали бўлмаган! Катта бахт ва саодат тилайман! Келин болага ҳам гап йўқ, ҳамма қизлар ҳам бунақа тўйга кўнмайди», — деб фикр билдирган ёшларни табриклаган аёллардан бири. Кўпчилик уларга ҳаваси келаётганини ҳам тан олган.
Бир гуруҳ фойдаланувчилар Беҳзод ва Дилафрузнинг бу қарори дабдабали, хўжакўрсинга тўй ўтказиш ниятидагилар учун ҳақиқий ибрат эканини таъкидлаган. «Қорни тўқ қариндошларни тўйдиргандан, шундай байрам ўтказган яхши», — деб ёзади улардан бири.
Фикр билдирганлар орасида Беҳзоднинг дўстлари ҳам бор: «Бу бизнинг Беҳзод! Баракалла, дўстим! Илоҳим, бахтли бўлгин! Шу ишинг зўр бўлибди!», — деб ёзган Шаҳзод Қодиров.
Изоҳ (0)