Ўзбекистон Савдо-саноат палатаси биносида виночилик ва ликёр-ароқ маҳсулотларини ишлаб чиқариш соҳасида фаолият юритиб келаётган, жумладан, Нидерландия, Италия, Испания, Эстония, Латвия, Германия, Грузия, Россия, Украина каби Европанинг энг йирик компаниялари вакиллари жамланди. Бу ҳақда палатанинг ахборот хизмати хабар берди.
Тадбир доирасида меҳмонлар учун инвестицион муҳитни такомиллаштириш бўйича мамлакатда амалга оширилаётган ислоҳотлар, шунингдек виночилик маҳсулотларини ишлаб чиқариш соҳасида Ўзбекистоннинг салоҳиятига доир тақдимотлар ўтказилди.
Тадбирда Russian Standart компаниясининг вакили Сергей Пушчинский маълум қилишича, компания жаҳоннинг 80 та давлатида мавжуд бўлиб, тармоқдаги энг машҳур брендлардан бири саналади. Компания раҳбарияти томонидан Ўзбекистонда ҳам завод очиш масаласи кўрилмоқда.
Бундан ташқари, Ўзбекистонга ташриф доирасида компания Савдо-саноат палатаси кўмагида маҳаллий «Saphir Group» МЧЖ билан жорий йилдаёқ заводни қуриш бўйича қўшма ишни бошлаш тўғрисида келишувга эришган.
Изоҳ (0)