«Ўзмедэкспорт» республика ташқи иқтисодий давлат корхонаси Россиянинг «Фармстандарт» компанияси билан ўзаро ҳамкорлик меморандумини имзолади. Бу ҳақда Ўзбекистон Соғлиқни сақлаш вазирлиги ахборот хизмати «Дарё»га маълум қилди.
Меморандумнинг мақсади — дори-дармон таъминоти бўйича томонлар учун ўзаро манфаатли бўлган узоқ ва ишончли ҳамкорликни йўлга қўйишдир. Ҳужжатга кўра, ушбу меморандумнинг амал қилиш муддати 3 йил этиб белгиланган.
Қайд этиш жоиз, «Фармстандарт» дори-дармон тайёрлаш ва ишлаб чиқариш билан шуғулланувчи Россиядаги йирик фармацевтик компаниялардан бири ҳисобланади. У йилига 17 миллиарддан ортиқ ўрамда кўплаб турдаги дори-дармон ишлаб чиқариш қувватига эга.
Маълумот учун, 2017 йил 1 августдан бошлаб ижтимоий аҳамиятга эга дори воситалари ва тиббиёт буюмларини четдан харид қилиш истисно тариқасида «Ўзмедэкспорт» корхонаси томонидан, тендер савдолари ўтказилмасдан амалга оширилиши белгилаб қўйилган эди.
«Илгари хориждан харид қилинаётган дори воситалари то Ўзбекистонга киритилиб, дорихоналарга тарқатилгунига қадар бир неча босқичлардан ўтарди. Натижада ортиқча расмиятчиликлар сабаб, зарур дори белгиланган муддатидан кечикиб етиб келарди. Дори воситаларининг тендер савдоларисиз харид қилиниши айни шу масалага ечим бўлиши кутилмоқда», — дейилади ССВ ахборотида.
Изоҳ (0)