«Меҳр ва Оқибат» ҳайвонларни ҳимоя қилиш жамияти Тошкент ҳукуматининг пойтахтда дайди ҳайвонларни тутиш бўйича ишларни кучайтириш қарори юзасидан изоҳ берди, деб ёзади «Газета.uz».
«Ҳукумат инсонлар масъулиятсизлиги оқибатлари билан курашмоқда (ҳайвонлар кўчада қандай пайдо бўлиб қолганини эслаш керак, холос). Ҳайвонларни йўқ қилиш масалани ҳайвонлар ҳимоячилари билан муҳокама қилиш, дайди ҳайвонлар муаммоси ҳал этиб бўлинган ривожланган мамлакатлар тажрибасига мурожаат қилиш ва ўз шаҳрида, кейин эса мамлакатида нимадир қилишга уринишдан кўра анча осонроқ. Биз нима учун шундайлигини тушунамиз, аммо буни қабул қилмаймиз», — дейилади жамият баёнотида.
«Ҳозир давлатга қийинлигини, ҳал қилиш учун кўплаб масалалар кутиб турганини ва Президентимиз шарофати билан кўплаб муаммолар аста-секинлик билан ечилаётганини тушунамиз. Бундай вазиятларда айнан биз — фуқаролар, жамоатчилик ташкилотлари — бирлашиб, мамлакатимизга бизнинг иштирокимизда ҳал қилиниши мумкин бўлган масалаларда ёрдам беришимиз керак», — дея таъкидланади.
Жамият уни бундай масалаларни муҳокама қилишга ҳатто жалб этмасликларини афсус билан қайд этар экан, дайди ҳайвонларни тутиш хизматини қайта ташкил қилиб, унинг ўрнига дайди ҳайвонларни қутқариш хизматини тузишни таклиф қилмоқда. Хизмат мақсади «қутқариш ва асраш» бўлиши керак.
«Меҳр ва Оқибат» ҳокимиятнинг турли тармоқлари, вазирликлар ва муассасалар, нодавлат нотижорат ташкилотлар, жамоатчилик вакиллари иштирокида ишчи гуруҳ тузиб, «Ҳайвонларга инсоний муносабатда бўлиш тўғрисида»ги қонун лойиҳасини ишлаб чиқишни таклиф этмоқда.
Изоҳ (0)