Қозоғистон нефть транзити кафолатлаган тақдирда Чимкентдан Ўзбекистон чегарасигача нефть қувури тортишга тайёр. Бу ҳақда мамлакат энергетика вазири Канат Бозумбаев маълум қилди, дея хабар беради «1news.uz».
«Ўтган ҳафта бу масала Россия энергетика вазири Александр Новак билан, бу ҳафта Ўзбекистон бош вазирининг ўринбосари Ғуломжон Ибрагимов билан муҳокама этилди», — деди Бозумбаев.
Гап совет даврида Жанубий Қозоғистон вилоятининг Шагир қишлоғидаги нефть станциясини Ўзбекистон билан боғлаган нефть қувурини тиклаш ҳақида кетмоқда. Ҳозирда қувурнинг мазкур қисми консервация қилинган.
«Қачонлардир нефть қувури алоҳида бўлган, у Шагирдан Ўзбекистонгача борганди. Бироқ кейинчалик у консервация қилинди, ҳатто айрим жойлари қисмларга ажратиб ташланди. Унинг тикланиши Ўзбекистон ва Россия томонидан нефть транзити ҳажмлари кафолатига боғлиқ. Агар ҳажмлар ўзини оқлайдиган даражада бўлса, тиклашга киришиш мумкин», — таъкидлади Қозоғистон энергетика вазирининг ўринбосари Асет Магауов.
Олдинроқ «Ўзбекнефтегаз» Қозоғистон ва Россия билан Омск —Павлодар—Чимкент тизими бўйлаб нефть етказиб бериш бўйича келишувга эришганди. Қўшимча хом ашё Жиззахда қурилаётган нефтни қайта ишлаш заводи учун керак бўлади.
Изоҳ (0)