Тошкент шаҳар божхона бошқармаси ташаббуси билан ташкил этилган очиқ мулоқотда экспорт борасида яратилган имтиёзлар ва қулайликлар муҳокама этилди, деб хабар берди «Kommersant.uz».
Ташқи иқтисодий фаолият қатнашчилари ва соҳага қизғин муносабат билдирувчилар иштирокида ўтган мулоқотда қайд этилганидек, 2017 йил 1 июндан эътиборан тадбиркорларга ўзлари ишлаб чиқарган товарларни, умумий суммаси 100 минг АҚШ доллари эквивалентидан ошмайдиган шартномалар асосида, чет эл валютасида олдиндан тўловсиз, аккредитив очмасдан, банк кафолатини расмийлаштирмасдан ҳамда экспорт шартномасини сиёсий ва тижорий хавфлардан суғурта полисисиз экспортга чиқаришга рухсат берилди. Лекин янги мева-сабзавот, узум ва полиз маҳсулотлари, шунингдек, Ўзбекистон Республикаси Президентининг 1997 йил 10 октябрдаги «Товарлар (ишлар, хизматлар) экспортини рағбатлантириш бўйича қўшимча чора-тадбирлар тўғрисида»ги 1871-сонли Фармони 2-иловасида кўрсатилган пахта толаси ва момиғи, ундан йигирилган ип, ишлов берилмаган нефть, газ конденсати, нефть маҳсулотлари, табиий газ, электр энергияси, қимматбаҳо металлар, рангли ва қора металлар ҳамда уларнинг парчалари ва чиқиндилари бундан мустасно.
Иккинчидан, ушбу шарт асосида экспорт қилинган товарлар бўйича валюта тушумини таъминлаш муддати 90 кун қилиб белгиланди.
Учинчидан, юқорида тилга олинган фармоннинг 4-иловасида кўрсатилган экспорт қилиниши тақиқланган товарлар Давлат раҳбари ёки ҳукумат қарорлари асосида экспортга чиқарилиши белгиланди. Бу маҳсулотлар сирасига буғдой, жавдар, арпа, шоли, маккажўхори, маржумак донлари, ғалла унидан тайёрланган қандолатчилик маҳсулотлари, печеньелар, сухариклар, қовурилган бурда нонлар ва шу йўсинда пиширилган шахсий маҳсулотлар, ун, ёрма, ҳайвон, парранда, гўшт ва калла-поча, ичак-човоқдан тайёрланган озиқ-овқатлар, қанд-шакар, Маданият вазирлиги хулосасига кўра, бадиий, тарихий, илмий ва маданий жиҳатдан муҳим аҳамиятга эга деб топилган қадимги суратлар, ҳайкалтарошлик асарлари ва бошқалар, ўсимлик ёғи, терилар (ностандартлари ҳам), мўйна хом ашёлари (ностандартлари ҳам қўшилади), рангли металлар парчалари ва чиқиндилари, волфрамли рудалар ва концентратлар, титиб эшиладиган ипак қурти пиллалари, ипак чиқитлари, чувашга яроқсиз пиллалар, пилла толаси чиқитлари ва юмшатилган чиқиндилари, полиэтилентерефталат плёнка чиқиндилари, резги ва қириндилари киритилди.
1 июлдан эса тадбиркорлик субъектларига янги мева-сабзавот, узум ва полиз маҳсулотларини ҳақини олдиндан 100 фоиз тўлаш шарти билан тўғридан-тўғри шартномалар асосида экспорт қилиш ҳуқуқи берилди.
Муҳим янгиликлардан бири хўжалик субъектлари маҳсулотлар (ишлар, хизматлар) экспортидан тушадиган валюта маблағларининг 50 (февралда миқдор тенг ярмигача қисқартирилди) фоизини давлатга сотиш шарти бекор қилингани бўлди.
1 сентябрдан эътиборан эса четдан келтириладиган айрим турдаги товарларга нисбатан қўлланиладиган аксиз солиғи ҳамда божхона божи ставкаларига тегишли ўзгартиришлар киритилди. Масалан, авваллари буғдой уни учун 5 фоиз миқдорида аксиз солиғи ундириб келинган эди, эндиликда у бекор қилинди. Бир қатор гўшт маҳсулотлари учун белгиланган божхона божи ва аксиз солиғи ставкалари ҳам сезиларли даражада пасайтирилди. Қаҳва, унинг ўрнини босувчи, таркибида қаҳва бўлган барча турдаги пропорсиялари учун бу кўрсаткич олдин 10 фоизни (бироқ 1 кг учун 0,7 АҚШ долларидан кам эмас) ташкил қилган бўлса, ҳозир 5 фоизга (бироқ 1 кг учун 0,3 доллардан оз эмас) камайтирилди. Сариёғ маҳсулоти учун белгиланган божхона божи бекор қилинди. Шакар маҳсулотлари учун белгиланган товар аксиз солиғи 10 фоиздан 5 фоизга туширилди. Ҳайвонлар емиши учун ишлатиладиган холин, хлорид озуқаси, бройлер учун витамин ва минераллар, озуқа концентрати, ветеринария соҳасига оид қушлар озуқаси учун 70 фоиз миқдорида белгиланган аксиз солиғи ҳам бундан буёғига ундирилмайди.
Навбатдаги ўзгариш бўйича ташқи иқтисодий фаолият товар номенклатурасининг 3001 позициясидан 3004 позициясигача бўлган ва 3006 позициясидаги фармацевтика маҳсулотлари учун белгиланган божхона божлари бутунлай бекор қилинди.
Изоҳ (0)