Чеченистон раҳбари Рамзан Қодиров ҳатто бутун дунё Россия президенти Владимир Путинга қарши чиқса ҳам, у томонда қолишини, чунки Россия етакчиси адолат тарафида турганини айтди, деб ёзади «РИА Новости» унинг Telegram-каналига таяниб.
Аввалроқ Қодировнинг Мьянмадаги вазият юзасидан баёноти қатор ОАВлар томонидан у Москванинг нуқтаи назарини нотўғри деб топса, унга қарши чиқишга тайёрлиги сифатида нотўғри талқин қилинган эди.
«Ким менинг гапларимни эшитган бўлса, буни қандай айтганимни ва нимани назарда тутганимни билади. Россия ҳеч қачон мазлумларга ёрдам беришга қаратилган чораларга тўсқинлик қилмаслигига ишонаман», — деб ёзди Қодиров.
У Путин билан 15 йилдан буён таниш эканлигини ва унинг аниқ позициясини билишини айтди. «Мен Путиннинг пиёда аскариман. Ҳатто бутун дунё унга қарши чиқса ҳам, унинг томонида бўламан ва унинг содиқ пиёда аскари бўлиб қоламан. Менга адолатга эришиш учун ишонч билдирилган! Ва бу ишонч энг оқил ва адолатли президентнинг ишончи», — деб ёзди Чеченистон раҳбари.
Изоҳ (0)