Миробод тумани ИИБ собиқ биносининг яқинидаги ёнғинга газ баллонини таъмирлашдаги хатолик сабаб бўлган

Тошкент шаҳри Миробод туман ИИБнинг собиқ биноси ёнида 2017 йилнинг 26 август куни кучли ёнғин юз бергани ҳақида хабар берилган эди.

Тошкент шаҳар ИИББ Ёнғин хавфсизлиги бошқармасининг маълум қилишича, 2017 йил 26 август куни, соат 12:04 да Тошкент шаҳар ИИББ ЁХБнинг 101 рақамига хабар келиб тушган. Хабарга кўра, Миробод тумани «Иноқобод» маҳалласи, 8 март кўчаси 57-уйда жойлашган «Кислород азот транс сервис» МЧЖга қарашли таъмирлаш устахонасида ёнғин содир бўлган.

Ёнғин содир бўлган жойга 5 та ўт ўчириш бўлинмаси юборилган. Мазкур жамиятга қарашли таъмирлаш устахонасининг ички қисмида тахминан 200 квадрат метрдаги ҳудуд ёнаётганлиги аниқланган. Соат 12:25 да ёнғин қуршаб олиниб, 12:34 да ўчирилган.

Ёнғин оқибатида «Кислород азот транс сервис» МЧЖга қарашли кислород ва газ баллонларини таъмирлаш устахонасининг ички қисми ҳамда жиҳозлари, қурилиш моллари зарар кўрган.

Аниқланишича, газ баллонини таъмирлаш вақтида ёнғин хавфсизлиги қоидаларига риоя қилинмаганлиги оқибатида ёнғин келиб чиққан.