Олий Мажлис Қонунчилик палатаси депутати Абдуқодир Тошқулов ЎзЛиДеП партиясининг Facebook’даги саҳифасида уюштирилган онлайн мулоқот давомида Тошкент давлат иқтисодиёт университети (ТДИУ) кириш тест имтиҳонларида қайд этилган шубҳали «тасодифлар»га муносабат билдириб ўтди.
Онлайн мулоқотда қатнашган томошабинлардан бири депутатга: «ТДИУга кириш тест натижалари ҳақида эшитган бўлсангиз керак. Сизнинг бу борадаги фикрингиз қандай?», — деган мазмунда савол берди. Депутат Тошқуловнинг қайд этишича, ТДИУдаги бу ҳол кўп йиллардан бери одамларнинг оғзида эди.
Жуда нозик савол. Тошкент давлат иқтисодиёт университетидаги кириш тестлари йиллар мобайнида одамларнинг оғзида эди. У ердаги адолатсизлик, бошқа-бошқа масалалар муҳокама бўларди.Минг афсус, давлатимиз раҳбари томонидан тест имтиҳолари устидан назоратни амалга ошириш бўйича талаблар қўйилишига қарамай, ҳукумат бу масала бўйича катта саъй-ҳаракатлар қилишига қарамасдан, ўзингиз кўрдингиз — ўтиш баллидан пастдаги балл 2—2,5 баробар фарқ қиляпти.
Мен ўзим 20 йил таълимда ишлаганман. Ҳозир ҳам ярим ставкада дарс бераман. Лекин таълимда ишлаган-ишламаганидан қатъи назар, бу ҳолат барча учун аниқ жавоб. Бу ҳолат бўйича менинг фикрим худди сизникидек.
Давлатимиз раҳбарининг бир неча чиқишларида кузатдим — тест имтиҳонлари ислоҳ бўлади. Бундан тўрт йиллар аввал ЎзЛиДеП Сиёсий кенгаши йиғилишида: «Тестни ҳам ислоҳ қилишимиз керак, бунда ёмон жиҳат йўқ. Баъзи давлатлар иншони қўшяпти, бу масалаларни ҳам ўйлаш керак», деганимизда бирозгина эътироз бўлди: «Сиз ҳамма давлатни ҳавас қилаверманг. Бизда яхши».
Ўшанда ҳам бу университетда аҳвол мана шундай эди. Шунинг учун, мен аминман, кейинги ўқув йилида барча хатоларимиз ҳисобга олиниб, умуман қабул жараёни ислоҳ қилинади. Таълимдаги ислоҳотларимиз энди бошланди. Бу жуда оғир жараён. Бунга вақт керак. Хорижий давлатлар тажрибасини ҳақиқатда ўрганишимиз керак.
Абдуқодир Тошқулов, Олий Мажлис Қонунчилик палатаси депутати
Изоҳ (0)