Апрель ойида Душанбеда Ўзбекистон саноат маҳсулотлари кўргазма-ярмаркаси бўлиб ўтди, у ерда «Ўзавтосаноат» компанияси ҳам 200 дан ошиқ номдаги маҳсулотларини тақдим этди. Тожикистонликларда Ravon бренди остидаги автомобиль катта қизиқиш уйғотди. Натижада кўргазма тугаб, шартномалар тузилгач, Душанбеда дарҳол Ravon автосалони очилди, у ерда ўзбек машиналарини сотишни аллақачон бошлаб юборишган. Бу ҳақда Asia-Plus нашри хабар бермоқда.
Автосалонда R2, R4, Gentra, Nexia R3, Damas енгил автомобиллари, шунингдек, Лабо мини юк машиналари сотилмоқда. Шу ернинг ўзида автосервис ва эҳтиёт қисмлари омбори ҳам жойлашган.
Автосалон директори Фарруҳ Замонов сўзларига кўра, фаолиятига кўп бўлмаган бўлса-да, Ravon автосалони Тожикистон автобозорида сезиларли муваффақиятларга эришган.
Унинг айтишича, янги автомобилларни олиб келиш учун божхона божлари ставкасининг пасайтирилгани натижасида, харидорнинг буюртмаси билан автомобиль Душанбега 2 кундан 10 кунгача бўлган муддатда етказиб берилади.
Ўтган вақт ичида Душанбега 40 та автомобиль етказилган, шуларнинг 30 тадан кўпи сотиб бўлинган.
«Бизнинг харидорларимиз — нафақат оддий фуқаролар, балки давлат муассасалари ва компаниялар ҳамдир. Машиналаримиз нархлари 6700 дан 12 600 долларгача бўлган оралиқда», — деди Замонов.
Изоҳ (0)