Telegraph: Британия автосаноати тарихидаги энг қиммат автомобиль 22,5 миллион долларга сотилди

1956 йилда ишлаб чиқарилган Aston Martin DBR1 пойга машинаси АҚШдаги кимошди савдода 22,5 миллион долларга сотилиб, Британия тарихида ишлаб чиқарилган энг қиммат автомобилга айланди. Британия автомобилларига тегишли бундан олдинги рекорд 21,7 миллион долларни ташкил этган. Бу ҳақда The Sunday Telegraph нашрига таяниб, «ТАСС» хабар берди.

Ушбу тарихий битим Калифорния штатининг Монтерей шаҳридаги Sotheby’s кимошди уйида, ҳар йили бўлиб ўтадиган автомобиль ҳафталигида амалга оширилган.

Рекорд миқдорда сотилган ушбу спорт автомобилини британиялик машҳур автопойгачи Стирлинг Мосс бошқарган. Ушбу автомобиль 1959 йилда Германиянинг Ньюрбургринг трассасида бўлиб ўтган пойгада биринчи бўлиб маррага етиб келган. 1962 йилда кимошди савдоси орқали сотиб юборилган Aston Martin шундан сўнг пойгаларда иштирок этмаган ва кўчада ҳайдашга мўлжалланган транспорт воситасига айлантирилган.