Каскадёр-аёл Канадада Deadpool 2 фильмининг суратга олиш вақтида мотоциклда ҳаракат бажараётиб ҳалок бўлди. Бу ҳақда Ванкувер шаҳри полициясининг матбуот хизмати маълум қилди, деб хабар берди «ТАСС».
«Полиция каскадёр аёл Deadpool фильмининг суратга олиш жараёнида мотоциклда ҳаракат бажараётиб ҳалок бўлганини тасдиқлади. Ҳозирда полиция воқеа жойида», — дея шаҳар ҳуқуқ-тартибот органи ўзининг Twitter’даги саҳифаси ёзган.
TMZ янгиликлар порталининг гувоҳларга таяниб маълум қилишича, мотоциклдаги каскадёр 41 қаватли (149 метр) Shаw Tower биносининг биринчи қаватидаги витринага бориб урилган.
Фильмнинг биринчи қисми 2016 йилда чиққан бўлиб, дунё бўйлаб 783 миллион доллар йиғган. Унинг навбатдаги қисмининг премьераси 2018 йилнинг май ойига мўлжалланган эди.
Deadpool режиссёри Тим Миллер ҳамда бош рол ижросичи Райан Рейнолдс жорий йилда «Олтин глобус» кино мукофотининг «Энг яхши фильм» ва «Энг яхши эркак роли», шунингдек, АҚШ режиссёрлар гильдияси ва сценарийнавислар гильдияси мукофотларига номзодлик қилди.
Изоҳ (0)