Вазирлар Маҳкамасининг «Тошкент шаҳрининг марказий қисмини ободонлаштириш ва архитектуравий қиёфасини янада яхшилаш ҳамда аҳоли ва пойтахт меҳмонлари учун зарур шарт-шароитлар яратиш чора-тадбирлари тўғрисида»ги қарори эълон қилинди, деб ёзади Norma.
Ҳужжатга мувофиқ, Тошкентнинг А.Навоий, Олмазор, И.Каримов ва Фурқат кўчалари билан чегарадош ҳудудида Tashkent city халқаро бизнес маркази қурилади. Ушбу ҳудуддаги барча объектлар инвесторлар, шу жумладан, хорижий, халқаро грантлар, техник ҳамкорлик маблағлари, хайриялар, кредитлар ва бошқа тақиқланмаган манбалар ҳисобидан қурилади.
Қарорга кўра, Вазирлар Маҳкамаси қошида Tashkent city халқаро бизнес маркази ҳудудидаги объектларни қуриш ва улардан фойдаланиш бўйича дирекция ташкил қилинди. У лойиҳага хорижий инвесторларни жалб қилиш, улар билан музокаралар олиб бориш ва битимлар тузиш билан шуғулланади. Шунингдек, турар-жой ва одам яшамайдиган биноларни бузиш, ҳудудларни тозалаш, ер қазиш ва бошқа ишларни амалга ошириш учун пудратчи ташкилотларни жалб қилади.
Бундан ташқари, ҳужжатга мувофиқ Tashkent city Халқаро бизнес маркази маъмурий кенгаши тузилди. Унинг вазифалари марказ фаолиятини мувофиқлаштириш ва давлат назоратидан ўтказиш, унинг самарали фаолият кўрсатишини таъминлаш ва лойиҳалар амалга оширилиши устидан тизимли назорат ўрнатишдан иборат.
Изоҳ (0)