Ўзбекистон ташқи ишлар вазирлиги Халқаро муносабатлар ахборот-таҳлилий маркази, БМТ ривожланиш дастури ваколатхонаси ва ЕХҲТ лойиҳалари координаторининг офиси иштирокида Тошкент шаҳрида «Марказий Осиё — Ўзбекистон ташқи сиёсатининг асосий устувор йўналиши» мавзусида халқаро конференция ўтказди. Бу ҳақда «Ўзбекистон 24» телеканали хабар қилди.
Форумда кенг жамоатчиликни Ўзбекистоннинг чегарадош давлатлар билан дўстлик ва яхши қўшничилик муносабатларини мустаҳкамлашга йўналтирилган замонавий минтақавий сиёсати моҳияти ва мазмуни, шунингдек, Марказий Осиё минтақасида хавфсизлик ва барқарор ривожланишни таъминлашнинг муҳим масалалари бўйича мамлакат позиция ва ёндашувлари ҳақида хабардор қилинди.
Тадбирда Олий Мажлис депутатлари, Марказий Осиё давлатларидан экспертлар ва таҳлилчилар, Тошкент шаҳридаги дипломатик корпус, Ўзбекистоннинг қўшни давлатлардаги элчилари, Республика вазирлик ва идоралари, илмий-таҳлилий марказлари вакиллари ҳамда журналистлар иштирок этди.
Изоҳ (0)