Дания қироличаси Маргрете II нинг турмуш ўртоғи 83 ёшли шаҳзода Хенрик ўзлари вафот этганидан кейин рафиқаси ёнига дафн этишларини истамайди. Бу ҳақда қироллик саройи тарқатган расмий хабарда айтилади, деб ёзади «ТАСС».
Анъанага кўра, Дания монархлари ва уларнинг турмуш ўртоқлари Роскилле шаҳридаги соборга, қироллик мақбарасига кўмилиши керак. Аммо шаҳзода Хенрик олти асрдан буён риоя этиб келинган анъанани тўхтатишга қарор қилди. Шаҳзода, асл ватани Франция бўлишига қарамай, Данияга дафн қилинади, аммо аниқ жой белгиланганича йўқ. Хабарда таъкидланишича, қиролича эрининг режаларидан хабардор бўлган ва унинг қарорига рози, аммо унинг ўзи анъанадан воз кечмоқчи эмас.
Сарой матбуот котиби Ленне Баллебю сўзларига кўра, шаҳзоданинг бундай қарорига эр-хотиннинг тенг бўлмаган мартабалари, шунингдек, Данияда узоқ вақт яшаганига қарамай, ўзи қўлга киритмоқчи бўлган ваколат ва мақомларга эриша олмагани сабаб бўлган.
Изоҳ (0)