Rolls-Royce Phantom VIII: 450 минг долларлик янги моделдан нималарни кутиш мумкин

Британияликлар сўнгги бор Rolls-Royce Phantom VII’ни жорий йилнинг бошида чиқаришган эди. Ва ниҳоят Rolls-Royce унинг давомчисини — Phantom VIII’ни тақдим этди. Автомобиль премьераси Лондондаги Bonhams кимошди савдолар уйининг залида ўтказилган Тhе Grеаt Eight Phantoms кўргазмасида бўлиб ўтди, деб хабар берди Forbes.

«Rolls-Royce аллақачон ҳашаматга айланиб улгурган, Phantom эса унинг машҳур флагман модели. Айтиш мумкинки, афсонавий автомобиль ишлаб чиқарувчи компания узоқ йиллардан нафақат техник тавсифларни, балки эксклюзив ҳамда анъанавийликни ҳам сотмоқда. Rolls-Royce афсонасининг муҳим қисми — бренд тарихи: ушбу автомобиль қироллик оиласи ҳамда машҳурлар учун», — дея таъкидлайди Julius Bear’нинг Россия, Марказий ҳамда Шарқий Европа бўйича бошқарув директори Евгений Смушкович.

Rolls-Royce ростдан ҳам афсоналарни яратишни билади. Масалан, энг ноёб «фантом» ҳамон 1950—1956 йилларда, фақатгина қироллик оиласи ва давлат раҳбарлари учун ишлаб чиқарилган Phantom IV ҳисобланади. Бу каби автомобиллардан бор йўғи 18 та чиққан.

Phantom VIII’нинг ташқи кўриниши айтарли даражада аввалгиларидан фарқ қилмайди. Бироқ кузовининг шакли, олд ва орқа фаралари бироз ўзгарган, модель дизайнининг марказий элементи бўлмиш Пантом радиаторининг афсонавий панжараси бироз тепароқда жойлашган. Шунга қарамай Rolls-Royce автомобилнинг техник кўрсаткичлари борасида анча меҳнат қилди. Конструкторлар ҳамда ишлаб чиқарувчилар Phantom VIII’ни Rolls-Royce тарихидаги энг юқори технологик модель дея ҳисобламоқда. Phantom VIII’нинг платформаси алюминий ва ўта мустаҳкам углерод толасидан фойдаланиш орқали ясалаган. Шу сабабли унинг мустаҳкамлиги 30 фоизга ортган ва ўзидан олдинги аждодидан 10 фоизга шовқинсиз. Автомобиль 6,75 литрли V12 овозсиз двигатели билан жиҳозланган.

Модель корпусининг устига 6 миллиметрли махсус икки қаватли лак қатлами тортилган, конструкцияга умумий миқдорда 130 килограммдан ортиқ тувушни изоляция қилувчи материаллардан фойдаланилган. Бундан ташқари янги моделга махсус Silеnt-Sеаl шиналари ишлаб чиқарилган.

Knight Frank консалтинг компаниясининг 2016 йилдаги тадқиқотларига кўра, эксклюзив автомобиллар ўн йилликнинг энг яхши сармояси дея топилган: улар орқали 500 фоиз фойда кўриш мумкин бўлган. Бу эса қимматли қоғозлар, санъат асарлари ва кўчмас мулклардан келадиган даромаддан кўпроқ демакдир.