Олий ва ўрта махсус таълим вазири: 1 августдаги тест имтиҳонлари натижалари 10—12 кунда эълон қилинса керак

Халқаро пресс-клубнинг 2 август куни бўлиб ўтган анжуманида иштирок этган Ўзбекистон олий ва ўрта махсус таълим вазири Иномжон Мажидов мамлакат олий таълим муассасаларида 1 август куни бўлиб ўтган тест имтиҳонларининг натижалари қачон эълон қилиниши ҳақидаги саволга жавоб қайтарди.

Вазирнинг сўзларига кўра, тест имтиҳонларининг натижаларининг эълон қилиниши муддати аввалги йиллардан катта фарқ қилмайди. «10—12 кунда эълон қилинса керак», — деди вазир.

Ўз навбатида, Пресс-клуб раиси Шерзодхон Қудратхўжаев сўнгги йилларда тест натижаларининг эълон қилиниши 10—12 кундан кўпроққа чўзилаётганини эслатиб ўтди. Вазир бу ҳолатда деярли ҳамма нарса Давлат тест марказининг техник имкониятларига боғлиқ эканини таъкидлади.

Тест натижаларининг эълон қилиниши тўлиқ Давлат тест марказининг имкониятларига боғлиқ. 730 мингдан зиёд абитуриентнинг тестлари текшириб чиқилади. Бу жараёнларнинг бари автоматлаштирилган, ДТМ техникалари туну-кун ишлаб турибди. Жавоблар айнан қачон эълон қилиниши борасида аниқ бир нарса дея олмайман, 10—12 кунда эълон қилинса керак.

Иномжон Мажидов, Ўзбекистон олий ва ўрта махсус таълим вазири