Каталониянинг «Барселона» клуби Европа грандларини «ПСЖ»га қарши бирлашишга чақиришни бошлади. Бу ҳақда «Чемпионат» Франциянинг L'Équipe нашрига асосланиб маълумот берди.
Боиси парижликлар Неймарни қўлга киритиш учун найранг ишлатишдан қайтмаяпти. Бу бир қарашда рисоладагидек кўринса-да, «Барселона» раҳбарияти мавжуд ҳолатни футболнинг бугунги қоидалари ва этикетларига зид деб ҳисоблайди. Испан гранди бу борада «Бавария» ҳамда «Ювентус» раҳбарияти билан боғланишга улгурди ҳамда уларнинг ижобий жавобларини олишга эришди. Воқеалар ривожи шу тақлид давом этса, Европанинг топ клублари «ПСЖ»га қарши катта кучга айланиши мумкин.
Гап шундаки, «ПСЖ» Неймарни «Барселона» белгилаб қўйган кўтарма пули — 222 миллион еврога сотиб олишга рози. «Барселона» ҳам бразилиялик футболчи кетиш ниятида эканини тушуниб турибди. Парижликлар чиндан ҳам 222 миллион тўлай олса, Каталония клуби бунга қарши ҳеч нарса қила олмайди.
Бироқ парижликлар молиявий фейр-плей қоидаларини четлаб ўтишга уринаётгани «Барселона» раҳбариятига ёқмаган. Бунда францияликлар, аниқроғи, Неймарни қўлга киритишни истаётган араб инвесторлари 222 миллион еврони Неймарнинг қўлига тутқазишни ният қилган. Яъни, футболчи ўзининг трансферини «Барселона»дан ўзи сотиб олади ва эркин агентга айланади. «ПСЖ» эса сарф этилган 222 миллион ўрнини қандай қилиб тўлдириш ҳақида бош қотириб ўтирмайди.
Бунда Неймарга таклиф қилинаётган пулни беришда ҳам пухта ишланган режани кўриш мумкин. Агар футболчи «ПСЖ» билан шартнома имзоласа, бир вақтнинг ўзида Qatar Sports Investments билан ҳам битим тузиш имкониятига эга бўлади. Бу битим унга ЖЧ—2022 элчиси бўлишга ёрдам беради ва эвазига Неймар 5 йил ичида 300 миллион евро топади. Бу ҳар йили футболчи қатарликлардан 60 миллиондан олишини билдиради. Париж клуби эса бундай катта чиқим қилишдан қутулади.
Изоҳ (0)