Тошкент шаҳрида 2017 йил бошидан буён 400 дан ортиқ фоҳишахона сақлаш ва қўшмачилик қилиш жинояти аниқланди. Бу ҳақда Тошкент шаҳар ИИББда 20 июлда бўлиб ўтган брифингда маълум қилинди.
Таъкидланишича, фоҳишахона сақлаш ҳолати аниқланган ҳар бир хонадон ички ишлар идоралари томонидан хатланади. Хатланган хонадонлар улардаги ҳолатга қараб, яъни хонадонда фоҳишахона доимий равишда юритилган ёки йўқлигига қараб, хонадон суд ихтиёрига топширилади.
Суд хонадонни давлат фойдасига мусодара қилиш ёки қилмаслик ҳақида қарор чиқаради. Бунда ҳар бир ҳолатга алоҳида ёндашилиб, жиноятнинг оғирлиги, унинг содир этилиш шароити ва ҳолати суд томонидан ҳисобга олинади.
Агар фоҳишахона сақлаш жинояти хонадонни ижарага олган ижарачи томонидан содир этилса, суд томонидан хонадон эгасининг жиноятга алоқадорлиги текширилади. Қайд этилишича, агар ижарачи фоҳишахона сақлаш жиноятини содир этса ва уй давлат фойдасига мусодара қилинса, уй эгаси эса жиноятга алоқадор бўлмаса, жиноят содир этган ижарачи уй эгасига уйнинг қийматини тўлаб беришга мажбур бўлади. Бунда ҳам ҳар бир жиноятга алоҳида ёндашилади.
Изоҳ (0)