Ўзбекистон Республикаси Молия вазирлиги тартибга солинувчи давлат нархлари рўйхатини эълон қилди. Ҳужжатга кўра 2017 йил 1 июлдан эътиборан бир тонна шакар хом ашёсининг нархи 4 114 200 сўм этиб белгиланди, деб хабар берди «Новости Узбекистана».
Айни вақтда Ўзбекистонда 8 турдаги маҳсулот нархлари давлат томонидан бошқарилади. Буларга этил ва техник спирт, шакар, пахта хом ашёси ва толаси, пахта мойи, дон, буғдой уни ва буғдой нони киради.
Молия вазирлигининг маълумотига кўра, 2017 йил 1 июлдаги ҳолати бўйича Андижон биокимё заводида ишлаб чиқарилган озиқ-овқат этил спиртининг минг декалитри 61,3 миллион сўм, Янгийўл «Биокимё» АЖ томонидан ишлаб чиқарилган минг декалитр этил спирт 59,3 миллион сўм этиб белгиланган.
Бир тонна пахта хом ашёсининг нархи 1,2 миллион сўм, пахта толасиники эса 4,1 миллион сўмни ташкил этмоқда.
Давлат томонидан пахта ёғининг бир тоннасига нисбатан ўрнатилган нарх 3,7 миллион сўмга, ўсимлик ёғининг бир тоннасиники эса 3,3 миллион сўмга тенг.
Ҳужжатга кўра, жорий йилда бир тонна пахта кунжарасининг нархи 919 минг сўм, шелуха — 483,8 минг сўм этиб белгиланган. 2016 йилда бир тонна буғдойнинг сотиб олиниш нархи 503,5 мингни ташкил этган.
Изоҳ (0)