Қора музқаймоқ охирги пайтларда мода трендига айланди. Биз ҳаммамиз оқ ёки ҳар хил рангдаги муздек ширинликка ўрганиб қолганмиз.
Қора музқаймоқ ғояси дастлаб Японияда туғилган, кейин эса тезлик билан Америка ва бошқа мамлакатларга тарқалди.
Албатта, қора музқаймоқни ҳамма татиб кўришни хоҳлайди, чунки кўпчилик унинг ўзига хос рангидан ташқари ажойиб мазаси тўғрисида ҳам гапирмоқда.
Қора музқаймоқни сотиб олишга уриниб кўриш мумкин, лекин уни ўз қўлларимиз билан тайёрласак қизиқарлироқ бўлади. Бунинг устига керакли масаллиқларни топиш қийин эмас.
Зарур масаллиқлар:
- 250 мл ёғли сут,
- 250 мл ёғли қаймоқ,
- 4 дона тухум сариғи,
- 4 ош қошиқ қора кунжут пастаси,
- 0,5 пиёла шакар,
- 10 г ванилли шакар.
Тайёрланиш усули:
Девори қалин идишда сутни қаймоқнинг ярми билан аралаштиринг. Сутли аралашмани ўрта оловга қўйинг ва қайнаш ҳолатигача келтиринг.Кейин оловни пасайтиринг ва 1 дақиқа қайнатинг.
Тухум сариқларини шакар ва ванилли шакар билан бирга блендерда яхшилаб аралаштиринг.
Сутли аралашмани аста-секинлик билан тухум устига қуйинг ва аралаштиринг. Аралашмани девори қалин идишга солинг ва паст оловга қўйинг.
Аралашмани доимий қўзғаб турган ҳолда 2-3 дақиқа крем ҳолига келгунча ушлаб туринг.
Аралашма ичига қора кунжутли пастани қўшинг ва яхшилаб аралаштиринг.
Тайёр бўлган қоришмани доимий аралаштириш йўли билан совитинг.
Қолган қаймоқни блендер ёрдамида кўпиртиринг. Уни совиган массага қўшинг ва яна яхшилаб кўпиртиринг.
Кейин қоришмани контейнерга жойлаштиринг ва тўлиқ қотиб қолгунча музхонага қўйинг.
Энди қора музқаймоқни дастурхонга тортишингиз мумкин.
Ёқимли иштаҳа!
Изоҳ (0)