Бухоро вилояти ИИБ матбуот хизмати жорий йилнинг 6 ойида вилоят ички ишлар идоралари ходимлари вояга етмаганлар томонидан содир этилган жиноятлар ўтган 2016 йилнинг шу даврига нисбатан 27,6 фоизга, яъни 8 тага (29—37) кўп эканлигини маълум қилди.
Вояга етмаганлар томонидан содир этилган жиноятларни турлари бўйича тавсифлаганда, 1 та оғир тан жароҳати етказиш, 2 та талончилик, 3 та безорилик ва 31 та ўғрилик жиноятлари қайд қилинган.
Жиноятларни содир этишда иштирок этган вояга етмаганлар сони ҳам вилоятда кескин 9 тага кўпайиб, 38 нафарни ташкил қилган, булардан 11 нафари мактаб, 26 нафари касб-ҳунар коллеж ўқувчиларидир. Ачинарлиси, 4 нафар қиз болалар томонидан ҳам жиноят содир қилинганлиги кузатилган. Жиноят содир қилган 5 нафар вояга етмаганларнинг ота-онаси ажрашганлиги ёки улардан бири вафот этганлиги сабабли ёлғиз она ёки ёлғиз ота қарамоғида тарбияланаётганлардир. Шунингдек, 4 нафари ота-онаси узоқ муддатга кетганлиги ёки ажрашиб бошқа оила қурганлиги туфайли қариндошлари қармоғида бўлган ўсмирларни ташкил қилган. 2 нафари меҳрибонлик уйида тарбияланиб, ҳозирги вақтда Бухоро нефть ва газ коллежида таҳсил олиб, шу коллеж ётоқхонасида яшаётган чин етимлар томонидан ҳам ўзлари яшаётган ётоқхонада телефон ўғрилиги жиноятини содир қилганлар.
Ўз навбатида, бошқа вилоятлардан келиб, қаровсиз ва назоратсиз юрган вояга етмаганларни ўз вақтида аниқланмаётганлиги оқибатида, Сирдарё вилояти Сирдарё туманида яшовчи, Сирдарё тиббиёт коллежи ўқувчиси, 2000 йилда туғилган Абдураҳмонов Фарруҳ ота-онаси билан ўзаро келишмасдан, уйидан ўзбошимчалик билан Бухоро вилоятига қочиб келиб, Ғиждувон туманида ижарада яшаб, пули қолмаганлиги учун Бухоро шаҳар ҳудудида фуқароларга тегишли савдо дўконларидан 2 та ўғрилик жиноятлари содир қилган.
Жиноятларда иштирок этган 4 нафар вояга етмаганнинг ота-оналаридан бири фарзандини она ёки ота тарбиясида қолдириб, ўзи ишлаш мақсадида яшаш манзилидан узоқ муддатга чиқиб кетган. Бундан ташқари, 6 нафари иқтисодий жиҳатдан оғир аҳволда бўлган оилаларда тарбияланётган ўсмирларни ташкил этган.
Жиноятларнинг келиб чиқиш сабаблари бўйича таҳлил қилинганда, 4 таси (безорилик ва оғир тан жароҳати етказиш жиноятлари) ўзаро келишмовчилик туфайли, 1 таси танишидан пулларини қайтариб ололмаганли сабабли, 32 таси тенгқурларидан кам бўлмаслик, замонавий техника буюмларига эгалик қилиш, оиласидаги муҳтожлик ва текин бойлик орттириш мақсадида содир этилганлиги аниқланди.
Изоҳ (0)